«Lokomotıv jóndeý zaýyty» JShS jumysshylarymen júzdesý atalǵan seriktestiktiń óndiristik sehynda ótti. Jıynǵa kásiporynnyń 100-ge jýyq jumysshysy qatysty. Bul kezdesý «Aýyl» eńbek adamynyń mártebesi úshin kúresedi!» taqyrybynda ótti.
«Elimizde qarapaıym jumysshyny qurmetteý degen túsinik búginde qunsyzdanyp ketti. «Adamdy adam etken – eńbek» desek, qoǵamdyq qatynastar ózgergen qazirgi kezde biz naǵyz eńbek adamy dep kimdi baǵalap júrmiz? Bizde kimniń tamyr-tanysy kóp, sonyń joly bolǵysh. Kim pysyq bolady, sonyń jaǵdaıy jaqsy. Bizdińshe, eńbek adamy degenimiz, eń aldymen, taza jumys isteıtin, tabysyn mańdaı terimen tabatyn adal jan. Tań atqannan kún batqanǵa deıin tynym tappaı ter tógetin jumysshy qaýymy myna sizder. Jazdyń shilińgir ystyǵy men qystyń qaqaǵan aıazynda ashyq aspan astynda bel jazbaı eńbek etetin sharýalar. О́kinishke qaraı, bizde eńbek adamdaryn baǵalaý jetispeıdi. Qyzmetine adal jumysshy kez kelgen salada bolýy kerek. Sebebi, eńbek adamy áleýmettik qurylymdardyń mańyzdy bólshegine aınalýǵa tıis. «Aýyl» partııasynyń saılaýaldy baǵdarlamasynda eńbek adamyna erekshe quqyqtyq mártebe berýge qol jetkizý kerektigi taıǵa tańba basqandaı anyq jazylǵan. Partııanyń maqsaty – qarapaıym eńbek adamynyń mártebesin qaıtarý. Bul másele siz ben biz tize biriktirgende ǵana qolǵa alynady. Ondaǵan jyl boıy siresip qatqan seńniń kóbesi sizderdiń qoldaýlaryńyzben Májiliske barǵanda ǵana sógiledi», dedi kásiporyn jumysshylary aldynda sóz alǵan kandıdat Jıgýlı Daırabaev.
«Andas Agro» JShS jumysshy ujymymen kezdesýde Nıkolaı Arsıýtın: «Aýyl» partııasynyń negizgi maqsattarynyń biri – eńbek adamynyń qadirin arttyryp, mártebesin kóterý. Sondaı-aq olarǵa aýyl sharýashylyǵy óndirýshileri retinde artyqshylyqtar bere otyryp, «el asyraýshysyn» qasterleýdi qalyptastyrý», dedi.
