«Jalaý Myńbaıulynyń erligi týraly kóp aıtýǵa bolady. Ol Qyrǵyz avtonomııalyq Respýblıkasynyń atqarýshy komıtetiniń basshysy retinde avtonomııalyq respýblıkaǵa elimizdiń «Qazaq Respýblıkasy» degen tól ataýyn qaıtardy. Partııamyzdyń saıası baǵdarlamada dál osyndaı talap bar. Biz ony resmı túrde 2019 jyly Parlament minberinde ashyq túrde aıttyq. Bizdiń pikirimizshe, táýelsiz memlekettiń ataýy jerge emes, eldiń atyna baılanysty bolý kerek, ıaǵnı Qazaq Respýblıkasy. Ol kezde Úkimet ony qoldamady, biraq biz erte me, kesh pe soǵan kelemiz. Ol tarıhı ádilettilik dep sanaımyz», dedi A.Perýashev jınalǵan qaýym aldynda.
Partııa lıderi, sonymen qatar «Aqjoldyń» saıası baǵdarlamasyn tanystyryp, atqarǵan jumystar týraly baıandady.
«Biz sońǵy ret Parlamentte 12-aq depýtat boldyq, 107 depýtattyń arasynda. Daýys bergen kezde óte mańyzdy máselelerde azshylyqta qalsaq ta, bastamalarymyz 10 jyl, keıde 7-8 jyl ótken soń da iske asyp jatyr. Osyndaıda Álıhan Bókeıhannyń «Tiri bolsam, qazaq halqyna qyzmet qylmaı qoımaımyn» degen sózi eske túsedi», dedi partııa tóraǵasy.
Jıyn barysynda sóz alǵan partııa tóraǵasynyń orynbasary Qazybek Isa «Aqjoldyń» ózgelerden ereksheligin atap ótti.
«Qasıetti Mańǵystaý ólkesine – Pir Beket bastaǵan 362 áýlıeniń eline, Úshqııannyń jerine tabanymyz tıip tur. Qart Kaspııdiń jaǵasynda er Jalaýdyń eskertkishine taǵzym ettik. «Aq jol» partııasynyń basqa partııalardan, basqa qoǵamdyq uıymdardan aıryqsha ereksheligi ulttyq múddeni qorǵaıtyn «Alash» ıdeıasyn tý etip ustap, ulttyq ıdeıa retinde ustap ulttyq múddemizdi qorǵap kele jatqan partııa ekenin bilesizder. Ulttyq ıdeologııany tý etip ustaǵan partııa bolǵandyqtan, bıyl saılaýdyń joryǵyn Altyn Ordanyń atasy, qazaq handarynyń babasy – Joshy hannan, qasıetti Ulytaýdan bastadyq. Endi qasıetti Mańǵystaý eline de tabanymyz tıdi», dedi ol.
Odan keıin shtab músheleri Qamqor-Mashzavod kásipornynyń jumysymen tanysyp, eńbek ujymymen kezdesti.
