Infografıkany jasaǵan Amangeldi Qııas, «EQ»
Qazirgi kúni tólem kartasyn qoldanýshylar arasynda qolma-qol aqshasyz operasııalardyń eń tanymal tásili – mobıldi bankıngti paıdalaný. Byltyr operasııalardyń jalpy qurylymyndaǵy onlaın tranzaksııa úlesi 64,6%-dy qurady. Kún saıyn árbir azamat sıfrly bankıng arqyly orta eseppen 234,7 mlrd teńgeden asa somaǵa 15,2 mıllıonǵa jýyq tranzaksııa júrgizedi eken. Sonymen qatar alty júz myńǵa tarta kásipkerdiń 92,5 paıyzy QR kod arqyly tólem júrgizgen.
Qazaqstanda tólem kartalaryn 18 bank pen «Qazpochta» AQ júzege asyrady. 2023 jyldyń aqpanyndaǵy jaǵdaı boıynsha bankterdiń aınalymdaǵy kartalar sany – 65,9 mln. Keńinen taralǵan debettik kartalardyń úlesi – 78,9%, nesıelik kartalar úlesi 17,9% boldy. Qańtar aıynda qazaqstandyq emıtentterdiń tólem kartasy arqyly júrgizilgen tranzaksııalardyń kólemi 10,3 trln teńge, sany – 759,3 mln. Onyń ishinde qolma-qol jasalmaıtyn tranzaksııa sany 69,2%-ǵa artyp, 8,8 trln teńgeni quraǵan. Tólem kartany qoldanýshylar arasynda qolma-qol aqshany alý operasııalarynyń sany 17,3 mln birlikti qurap, kólemi 16,3%-ǵa artqan. Qazaqstan aýmaǵynda qolma-qol aqshasyz operasııalardyń negizgi úlesi mobıldi bankıng pen POS-termınaldarǵa tıesili bolsa, qolma-qol aqshany berý operasııalary bankomattar arqyly iske asyrylady.
Jaqynda taǵy bir plastıkalyq karta aınalymǵa endi. VTB (Qazaqstan) klıentteri reseılik «Mır» tólem júıesiniń plastıkalyq kartasyn resimdeı alady. Ony shyǵarýǵa ótinim berý elimizdiń 17 óńirindegi banktiń kez kelgen bólimshesinde qoljetimdi.
Atalǵan bank ótken jyldyń jeltoqsan aıynan bastap «Mır» tólem júıesiniń sıfrly kartasyn iske qosty. Endi banktiń respýblıkamyzdaǵy klıentteri onyń fızıkalyq nusqasyn rásimdeı alady. Kartany ózine-ózi qyzmet kórsetý qurylǵylary men bank kassalary, Qiwi jáne Yurta termınaldary arqyly, mobıldi qosymshadaǵy esep-aıyrysý shotynan, basqa «Mır» kartasynan nemese derektemeler boıynsha ózge banktiń shotynan aýdarý arqyly tolyqtyrýǵa bolady.
