Bul saıası naýqannyń eń basty ereksheligi – Májilis depýtattyǵyna úmitkerlerdiń úshten biri 19 jyldan bergi kezeńde birinshi ret majorıtarlyq júıe boıynsha saılaýǵa túseıin dep otyr. Jalpy, álemdik deńgeıdegi iri saıasatkerlerdiń kóbi birmandatty okrýgten shyqqanyn eskersek, bul jolǵy saılaýda ádil báseke bolyp, buǵan deıin kóleńkede qalyp kelgen bilikti, elshil, namysty azamattar óz qabiletterin kórsetedi degen úmittemin. Keıingi jyldary saıası partııalarǵa degen halyq senimi azaıyp ketkeni belgili. Aldaǵy saılaýdyń nátıjesinde, osy senimniń qaıta oıanýyna sep bolatyn, el ıgiligine jumys isteıtin qýatty zańdar qabyldaıtyn úlken kúsh qalyptasady degen úmitimiz bar.
Eń bastysy, halyqtyń saıası naýqanǵa belsendi atsalysýy mańyzdy. Jeke basynyń, bala-shaǵasynyń, eldiń bolashaǵyn oılaǵan árbir azamat ózi tirkelgen saılaý ýchaskesine baryp, sanaly túrde óz tańdaýyn jasaýǵa tıis. Saılaýdaǵy halyqtyń belsendiligi – demokratııalyq qoǵamnyń birden-bir ólshemi.
Biz ózimiz aýyl sharýashylyǵyndaǵy adam bolǵannan keıin, únemi aýyldyń jaǵdaıyn oılap turamyz. Qazir úgit-nasıhat jumystarynyń naǵyz qyzyp turǵan shaǵy. Birtalaı jıynǵa qatysyp, úmitkerlerdiń baǵdarlamasymen tanystym. Bul jolǵy saılaý qarsańynda aýyl halqynyń turmysyn jaqsartý, aýyl ınfraqurylymyn damytý týraly jıi aıtylyp jatyr. Meni osy jaǵdaı qýantady. Kóńilge úlken úmit uıalatady.
«Birlik bolmaı, tirlik bolmaıdy», bárińizdi aldaǵy saılaýǵa bir adamdaı atsalysyp, el múddesi úshin daýys berýge shaqyramyn.
Saıran BUQANOV,
Qazaqstannyń Eńbek Eri
Qostanaı oblysy
