Onyń aıtýynsha, prokýratýra qyzmetkerleri saılaý prosesi zańdylyǵynyń saqtalýyn joǵary deńgeıde qadaǵalap jatyr. Buǵan deıin 17 naýryzǵa deıin prokýrorlar Parlament Májilisi depýtattarynyń saılaýy boıynsha 24 jáne máslıhattar boıynsha 13 zań buzý derekterin tirkedi. Atalǵan faktilerge jaýapty adamdar ákimshilik jazaǵa tartyldy.
«17-18 naýryzda saılaý zańnamasyn buzǵan taǵy 7 adam ákimshilik jazaǵa tartyldy. Olardyń úsheýi Parlament Májilisi depýtattarynyń saılaýy boıynsha zań buzǵan. Máselen, 17 naýryzda Oral qalasynda Qazaqstan Respýblıkasyndaǵy Saılaý týraly konstıtýsııalyq zańnyń talaptaryn buza otyryp, saýalanama júrgizgeni úshin sot qaýlysymen bir baspa basylymnyń menshik ıesine Ákimshilik quqyq buzý týraly kodekstiń 120-babynyń 3-bóligimen aıyppul salyndy. 18 naýryzda Túrkistan qalasynda Májilis depýtattaǵyna kandıdattardyń birine anonımdik úgit materıaldaryn taratqany úshin Ortalyq saılaý komıssııasynyń kelisimimen Ákimshilik quqyq buzý týraly kodekstiń 113-baby boıynsha sot 125 aılyq eseptik kórsetkish mólsherinde aıyppul saldy. Biraq bul onyń tirkeýiniń kúshin joıýǵa ákep soqpaıdy», dedi ol.
Osyǵan uqsas buzýshylyq Soltústik Qazaqstan oblysynda da tirkelgen.
«Taıynsha aýdanynyń prokýrory qysqartylǵan is júrgizý tártibimen aýdandyq máslıhat depýtattaǵyna kandıdatqa Ákimshilik quqyq buzý týraly kodekstiń 113-babymen aıyppul saldy. Dál osy bap boıynsha Atyraý qalasynda prokýror baspa basylymynyń ıesin 12,5 AEK kólemindegi aıyppulǵa tartty», dep qosty spıker.
Sondaı-aq Batys Qazaqstan oblysynda kandıdattyń aryzy boıynsha aýyldyq okrýgtegi memleket qyzmetkeri úgit júrgizý kezeńinde úgitteý materıaldaryn taratqany anyqtaldy. Ol Ákimshilik quqyq buzý týraly kodekstiń 122-babynyń 1-bóligimen jaýaptkershilikke tartyldy», dedi Azamat Sarǵazın.
Sondaı-aq ol daýys berý kúni buqaralyq aqparat quraldarynda saýalnama nátıjeleri, saılaý nátıjeleriniń boljamdaryn, saılaýǵa jáne kandıdattardy qoldap daýys berýge baılanysty ózge zertteýlerdi jarııalaýǵa jol berilmeıtinin eske saldy.
