«Biz elimizdiń baı-qýatty bolǵanyn qalaımyz. Al el senimine ıe bolǵan azamattar elimizdi damýdyń jańa satylaryna alyp shyǵady degen senimdemiz. Sol sebepti saılaýdyń da mańyzy zor. Osyndaı jaýapty iske alǵashqylardyń biri bolyp kelýdi jón kórdik. Zamandastarymyzdy belsendi bolýǵa shaqyramyn», deıdi egizder.
Oraldaǵy №415 saılaý ýchaskesine kelgen Arý men Sulý Baıdýllaevalar M.О́temisov atyndaǵy BQÝ-dyń 4 kýrs stýdentteri. Fızıka-ınformatıka mamandyǵy boıynsha bilim alyp jatqan arýlar oqýda da ozat. Bolashaq ustazdar búgingi saılaý jastardyń erteńgi kúnge degen senimin arttyratynyn aıtady.
Eshqashan juby jazylmaǵan qos arý saılaýǵa da birge kelip óz tańdaýlaryn jasady.
«Biz kishkentaımyzdan birge ósip, birge damyp, jetistikterge de birge qol jetkizip kelemiz. Búginde elimiz, bolashaǵymyz úshin mańyzdy tańdaýdy birge jasaý maqsatynda saılaýǵa keldik. Biz bolashaq urpaqty tárbıeleýshi ustazdarmyz. Elimizdiń sanaly azamattaryn qalyptastyrý úshin ózimiz de sanaly bolýymyz kerek. Saılaýǵa el erteńin oılaǵan, halqy úshin jany ashyǵan bolashaq urpaqty oqytyp, tárbıeleıtin azamattarymyz mindetti túrde qatysýy kerek dep sanaımyz», deıdi Arý men Sulý.
