– Bes ulym, eki qyzym bar. Balalarymnyń bári – boıshań. О́z boıym – 1 metr 95 santımetr, úlken ulymdiki – eki metr. Al Arýjanymnyń boıy – 2,2 metr. Qyzym óte baýyrmal, kisige jaqyn. Osy aýylda birneshe jyl boıy volonter jastardyń qatarynda júrip, Áýlıekóldi kógaldandyrýǵa atsalysty. Úlken-kishige, múmkindigi joq muqtajdarǵa qol kómegin tıgizip júrdi. Qanshama marapat aldy, bári úıde saqtaýly tur. Munyń syrtynda, osyndaǵy Shoqan Ýálıhanov mektebinde oqyp júrip, eki jyl bokspen aınalysty. Ájeptáýir jetistikterge jetip edi, pandemııa kezinde úıirme jabylyp, bokstan birjola qol úzip ketti, – deıdi Arýjannyń ákesi Kópjasar Dosymbekov.
Arýjan qazir Qostanaıda, Z.Aldamjarov atyndaǵy kolledjdiń ekinshi kýrsynda «Dene shynyqtyrý» mamandyǵy boıynsha bilim alyp jatyr.
– Qalaǵa kelgen soń, kóshedegi beıtanys adamdardyń suq kózine úırene almaı birazǵa deıin yńǵaısyzdanyp júrdim. Keıbireýler sizben sýretke túsip alaıyqshy dep ótinedi. Qazir úırenip kettim. Oqý úlgerimim de jaqsy. Voleıbol úıirmesine baryp júrmin. Taǵy bir kedergi – kóppen birge bazarǵa, dúkenge baryp kıim satyp ala almaımyn. Qostanaıda maǵan shaq keletin kıim joq. Sondyqtan jańa kıim alý úshin Áýlıekóldegi tigin sehyna tapsyrys beremin, – deıdi Arýjan.
Qostanaı oblysy
