Astanada «Álem» baletiniń premerasy ótti
Keshe Memleket basshysy Nursultan Nazarbaev Beıbitshilik jáne kelisim saraıynda ótken bir aktili «Álem» baletiniń premerasyn tamashalady. Bul – «Astana Ballet» ujymy repertýaryndaǵy zamanaýı horeografııa stılinde qoıylǵan alǵashqy biregeı qoıylym. Halyqtyq jáne zamanaýı horeografııanyń klassıkalyq dástúrleri men eń sońǵy úrdisterin sheber úılestire bilgen «Astana Ballet» horeografııalyq ujymy Qazaqstan Prezıdentiniń jeke usynysy boıynsha, 2012 jyldyń kúzinde qurylǵan bolatyn. «Astana Ballet»-tiń atqarýshy dırektory Valerıı Kúzembaev bul ujym osy ýaqyttan beri óziniń eshkimge uqsamaıtyn, qaıtalanbas «beınesin» qalyptastyrý úshin talmaı izdenis ústinde júrgenin aıtady. «Bir jyldan astam merzimde tynymsyz eńbek, Qazaqstan men sheteldegi kórermen aldyndaǵy sátti óner kórsetýler ujymnyń birtutas, bir aktili baletti sahnalaýǵa daıyn ekendigin anyq kórsetti. Alaıda, bizdiń ıdeıalarymyzdy júzege asyratyn jáne ózindik qoltańbasyn engize alatyn horeografty izdeý uzaqqa sozyldy. Keıin kórkemdik jetekshiniń tańdaýy máskeýlik qoıýshy-horeograf Nıkıta Dmıtrıevskııge tústi. Ol, bizdiń paıymdaýymyzsha, qazirgi zamanǵa saı óte tartymdy jáne bilikti baletmeısterdiń biri. Al qazirgi tańda, bizdiń ujym úshin damý, jańa pishinderdi oılap tabý, ózgeshe baǵyttardy baıqap kórý, zamanaýı bı ónerin kórsete otyryp, kórermenmen názik baılanys ornatý, ónerimizge qazaq halqynyń tek ózine tán ulttyq boıaýyn engizý mańyzdy. Bizdiń negizgi kózdegen maqsatymyz, mine, osy. Muny bir aktili «Álem» baletiniń óne boıynan barynsha ańǵartýǵa tyrystyq. Baǵalaý – kórermenniń enshisindegi dúnıe», deıdi ol bul týrasynda. Sonymen, «Álem» degen atpen qoıylǵan balettiń ózegi «jannyń týýy», «onyń túrli synaqtan ótýi», «zulymdyq pen izgiliktiń shaıqasy», «qarańǵy men jaryqtyń tartysy», osylardyń nátıjesinde «mahabbat pen sulýlyq áleminiń ornaýy» syndy oılar men ıdeıalardy kórsetýge saıady. Bul oraıda, kórermen atalǵan qoıylymdy sahnalaý baǵytynda aýqymdy jumystardyń atqarylǵanyn birden túısinetindeı. Buǵan bıshilerdiń aıryqsha sheberligi, izdenis jolyndaǵy eńbekteri – dálel. Sebebi, horeografııa salasyndaǵy sony álemdik úrdister men qazaq bı óneriniń, mádenıetiniń, dástúrli sazynyń utymdy sıntezdelýi, sózsiz, «Astana Ballet» ujymy deńgeıiniń joǵary ekendigin baıqatady. Etno-kompozıtor Býlat Gafarovtyń, lıbretto avtory Baqyt Qaıyrbekovtiń, Reseıdiń mýltımedııa jáne kompıýterlik grafıka salasynyń jetekshi mamandarynyń biri Leonıd Basınniń izdenisteri men eńbekteri de ábden, baǵalaýǵa turarlyq. Jalpy alǵanda, biregeı qoıylymnyń kóp kóńilinen shyqqany anyq ańǵarylyp turdy. Qoıylym sońynda óner ujymyna Elbasynyń atynan yqylas gúli tabys etildi. Láıla EDILQYZY, «Egemen Qazaqstan».
