Oqý-aǵartý mınıstri Ǵanı Beısembaevtyń aıtýynsha, mýzyka, ásirese dombyranyń áýezdi úni barlyq ultty jalpy adamı qundylyqtarǵa – toleranttylyqqa, tózimdilikke, birlikke úndep, bir arnaǵa toǵystyrady. Ári óskeleń urpaqtyń óz tarıhy men ónerin úırenýge degen umtylysy men qyzyǵýshylyǵyn oıatady.
– Dombyra – mádenıetimizdiń negizgi sımvoldarynyń biri, ulttyq qundylyǵymyz. Balabaqshanyń kishkentaı tárbıelenýshileri, oqýshylar, kolledj stýdentteri ulttyq aspapta oınaýǵa belsendilik tanytqany qýantady. Búgin dombyranyń shanaǵynan tógilgen ún elimizdiń ár óńirinde áýeledi. Oqýshylar urpaqtan-urpaqqa jalǵasyp kele jatqan mádenı murany saqtap, odan ári jalǵastyrady dep senemin, – dedi Ǵanı Beısembaev.
Chellendj sońynda Oqý-aǵartý mınıstri elordadaǵy D.Qonaev atyndaǵy №66 mektep-lıseıiniń oqýshylarymen birge kúı oryndady. «Naýryz meıramy» merekelik estafetasyna 1 mıllıonǵa jýyq oqýshy qatysty. Eń kishkentaıy – Batys Qazaqstan oblysy Terekti aýdanyndaǵy «Aqbota» balabaqshasynyń tárbıelenýshileri.
Bıyl «Naýryz meıramy» estafetasy elimizdiń barlyq mektebinde keń kólemde qamtyldy. Mereke kezinde jalpy respýblıkalyq «Taza tabıǵat» aksııasy, «Jasyl úı» chellendji, «Qaıyrymdy ult», «Qolónershiler jármeńkesi» qaıyrymdylyq sharasy, ulttyq taǵamdar festıvali men ulttyq oıyndar merekesi atalyp ótildi.
