«Amanat» partııasynyń tóraǵasy Erlan Qoshanov Astanadaǵy «Qazaqstan temir joly» ulttyq kompanııasynyń ǵımaratynda ornalasqan №110 saılaý ýchaskesinde óz tańdaýyn jasady. Ol tek demokratııalyq ádil saılaý nátıjesinde jáne jastardyń saıası arenaǵa erkin, kedergisiz kelýi arqyly ǵana kemel qoǵam qalyptasatynyn atap ótti.
«Saılaý joǵary deńgeıde uıymdastyrylyp otyr. Halyq óte belsendi. Biz úgit-nasıhat naýqany aıasynda elimizdiń barlyq óńirin aralap, azamattardyń saıası ómirge aralasýǵa degen qyzyǵýshylyǵy artqanyna kóz jetkizdik. Búginde árkimniń óz tańdaýyn jasap, el bolashaǵy úshin daýys bergeni mańyzdy», dedi Erlan Qoshanov jýrnalısterdiń suraǵyna jaýap bere otyryp.
«Aýyl» partııasynyń tóraǵasy Álı Bektaev elordanyń №113 saılaý ýchaskesinde daýys berdi. Partııa jetekshisi saılaýǵa otbasymen birge keldi.
Al «Respublica» partııasynyń tóraǵasy Aıdarbek Qojanazarov Astanadaǵy №393 saılaý ýchaskesinde daýys berdi.
«Bul saılaý biz úshin benefıs deýge bolady. Biz elimizdiń, urpaǵymyzdyń taǵdyry men ómirin qolǵa aldyq. Bul saılaý tek partııa úshin emes, bizdiń urpaq úshin mańyzdy. Bul saılaýdan kútetin ózgeristerge kelsek, bıýdjettiń ádil bólinýine, halyqty shyn máninde alańdatatyn zańdardyń qabyldanýyna áser etkimiz keledi. Mysaly, Qazaqstanda myń bir másele bar, biraq biz myń birinshi máseleni talqylaýǵa alamyz. Túkirý týraly zańdy alaıyq. Bul zańnan birde-bir qazaqstandyq baqytty jáne tabysty bolyp ketpedi, biraq nege ekeni belgisiz, ýaqytty bosqa ótkizip jatyrmyz. Ýaqytymyz óte az. 30-50 jylǵa ǵana jetetin munaı qaldy, osy jyldar ishinde biz balalarymyz ben nemerelerimiz munaı men gazdan táýelsiz, gúldengen elde ómir súrýi úshin bar kúshimizdi salýymyz kerek. Burynǵy Parlament músheleriniń kópshiligi 30-50 jyldan keıin bolmaıtynyn túsinemiz, biraq biz buǵan múddelimiz», dedi A.Qojanazarov.
«Aq jol» demokratııalyq partııasynyń tóraǵasy Azat Perýashev elordadaǵy №122 saılaý ýchaskesinde daýys berdi. «Saılaýdan Ádiletti Qazaqstandy kútemiz. Meniń oıymsha, 20 jyl boıy mundaı ashyq ári aýqymdy saılaý naýqany bolmaǵan shyǵar. Eger bizdiń qoǵam men memleket bul qarqyndy báseńdetpeı, ashyq dıalogti jalǵastyra berse, onda shynymen de bizdiń ómirimiz jaqsarady, Sonymen qatar bul qadamdar ádildikke baǵyttalǵan ózgeristerdiń basy bolmaq», dedi A.Perýashev.
«Baıtaq» jasyldar partııasynyń tóraǵasy Azamathan Ámirtaev Astanadaǵy №92 mektep-lıseıinde ornalasqan №52 ýchaskede óz tańdaýyn jasady. «Tańnan beri halyqtyń belsendiligi baıqalady. Bul – jaqsy úrdis. Bul saılaý ádil ótetinine senimdimin. Bul jerde eń basty másele – halyqtyń senimi. Halyq kimge senim artsa, solar depýtat bolyp, memleket ıgiligine jumys isteıdi», dedi A.Ámirtaev.
Jalpyulttyq sosıal-demokratııalyq partııasy tóraǵasy Ashat Rahymjanov Astana qalasyndaǵy №158 saılaý ýchaskesine keldi. «Búgin men ózimniń saılaý ýchaskeme kelip, qarapaıym el azamaty retinde tańdaýymdy jasadym. О́zderińiz biletindeı, ótken jyly referendým ótti. Onyń nátıjesinde saılaý júıesine jáne depýtattar korpýsyn qalyptastyrý úderisine ózgerister engizildi. Bul óz kezeginde elimizdegi saıası júıeniń ózgerýine áser etedi», dedi A.Rahymjanov.
Qazaqstan Halyq partııasynyń tóraǵasy Ermuhamet Ertisbaev elordadaǵy M.О́temisov atyndaǵy oqýshylar saraıynda ornalasqan №137 saılaý ýchaskesinde daýys berdi.
«Qazirgi saılaý – burynǵydan ózgerek. Táýelsizdik tarıhynda tuńǵysh ret majorıtarlyq júıege 30 paıyz berildi. Bul – qoǵamnyń suranysy. Sebebi otandastarymyzdyń basym kópshiligi partııa quramynda joq. Oń ózgeris nátıjesinde qoǵamdyq kóshbasshylar da dodaǵa túsip, baq synady. Bul el táýelsizdiginiń 30 jyldan astam tarıhyndaǵy eń qyzyqty, mazmundy jáne básekege toly saılaý boldy. Bul – halyqtyń jeńisi. Biz saıası saýatty memleketke aınaldyq», dedi E.Ertisbaev.
