Jalpy, qaıbir saılaýda da jurtty daýys berýge jumyldyrý úshin eleń etkizer jańalyqtardy alǵa shyǵarady ǵoı. Burynǵydaı ómirge qol ustasyp qatar attanǵan sáti daýys berý kúnine tap kelgen jastardyń neke qıǵyza sala qol ustasqan kúıi saılaý ýchaskesine kelýi qazir kreatıv emes. Mysaly, osy naýqanda Qarmaqshy aýdanyndaǵy Turmaǵambet aýylyndaǵy №109 saılaý ýchaskesinde jyrshylar jyr tókti. Tańdaý jasaýǵa kelip jatqandarǵa keremet áser syılaǵan baba ónerdiń muragerleri ózderi de daýys berip, jańarǵan qoǵamǵa qadam jasaýǵa úles qosty.
Jalaǵash aýdanynyń Buqarbaı batyr aýylynda Qabylanbek Nurmaǵanbetov aqsaqal daýys berýge búkil áýletin bastaı kelipti. Mańyzdy saıası naýqanda óz tańdaýyńdy jasaýǵa asyqpaýdy azamattyq paryzdy oryndamaý dep esepteıtin aqsaqal eldiń damýyna serpin beretin sátte árbir saılaýshy belsendi bolsa deıdi.
Saılaýdyń barysy týraly oblystyq saılaý komıssııasynyń tóraǵasy Ádilbek Ersultanov ótkizgen brıfıngte daýys berýdiń ashyq ári ádil ótýine bar múmkindik jasalǵany aıtyldy. Oblysta 486 002 saılaýshy bar. Olar daýys beretin 373 saılaý ýchaskesiniń barlyǵy talapqa saı, arnaıy kabınalarmen jabdyqtalǵan. Azamattar daýys berý ýchaskesin aldyn ala naqtylaý úshin 20 qańtardan bastap iske qosylǵan «О́zińdi saılaýshylar tiziminen tekser» servısin 30 myń adam paıdalanypty. Sonymen qatar telegram-bot (sailau_kzoBot) jáne «Smart Qyzylorda» mobıldi qosymshasy arqyly saılaýshylar tiziminen tekserý múmkindigi bar qyzmettiń kómegine júgingender 9 myńnan asady. Saılaýǵa qatysatyn múgedektigi bar 2 997 turǵyn úshin barlyq múmkindik jasaldy. Qımyl-qozǵalysy qıyn azamattardy 32 ınvataksı tasymaldasa, 42 onlaın sýdoaýramashy ym tili qyzmetin kórsetti.
Jalpy, saılaý úderisin 14 halyqaralyq baıqaýshy, respýblıkalyq 14 qoǵamdyq birlestik, 25 jergilikti uıym baqylady.
Qyzylorda
