Ádettegideı, bul kúni Pavlodar, Ekibastuz jáne Aqsý qalalarynda qoǵamdyq kólikter jolaýshylardy tegin tasymaldady. Múmkindigi shekteýli jandarǵa arnalǵan ınvataksıler de óz qyzmetterin tegin kórsetti. Keı azamattar densaýlyǵyna baılanysty úıden daýys berýdi qalasa, saǵat 12.00-ge deıin tıisti saılaý ýchaskesine habarlasyp, ótinish qaldyra aldy. Al turaqty tirkeýi joq azamattarǵa belgili bir ýchaskede ýaqytsha tirkelip, tańdaý jasaýǵa múmkindik berildi.
Bıyl otaý qurǵandaryna 60 jyl tolǵaly otyrǵan Qadyr Arynov pen batyr ana Qalamshash Arynova Maı aýdanynyń Kóktóbe aýylyndaǵy saılaý ýchaskesine eldiń aldy bolyp kelip daýys berdi. Qalamshash áje – 10 qursaq kótergen ana. Bıyl jetpis jetige keletin keıýana saılaý ýchaskesindegi halyqtyń ashyq-jarqyn júzin, kóńildiń hoshyn ashatyn aýandy kórip, qýanyp turǵanyn jetkizdi.
«Kelip jatqan aýyldastarym kóp, ásirese, jastardyń belsendiligin baıqadym. Barlyǵy elimizdiń bolashaǵy, halqymyzdyń jarqyn ómiri úshin tańdaý jasap jatqany sózsiz. Ýchaskede qarsy alǵan komıssııa músheleri tań atpaı kóńilimizdi kóterip, syılyq daıyndap qoıypty. Bul saılaýda sózi – durys, isi – túzik, bilimdi azamattar jeńiske jetse eken dep tileımiz. Ádiletti Qazaqstandy qurýǵa atsalysyp jatqanymdy maqtanysh tutamyn», dep atap ótti batyr ana.
Bul kúni Baıanaýylda turatyn Ekinshi dúnıejúzilik soǵys ardageri Qaıyr Hasenov pen aımaqtyń abyz aqsaqaly, ardager ustaz Zekebaı Soltanbaıuly úı jaǵdaıynda daýys berdi. 98 jastaǵy qart maıdanger surapyl soǵysta 6-armııa quramynda soǵysyp, Ýkraına jerlerin azat etýge qatysqan. Eren erligi úshin II dárejeli «Uly Otan soǵysy» ordenimen, birneshe medalmen marapattalǵan.
«Zamanymyz tynysh bolsyn, Jaratqan azamattarymyzdyń baǵyn asyrsyn. Jas urpaqtyń keleshegi kemel, aspanymyz ashyq bolǵaı. El irgesi nyǵaıa bersin», dep bata berdi qazynaly aqsaqal.
Al 18 jasqa tolǵan pavlodarlyq turǵyn Araı Temirbolat alǵash ret saılaý ýchaskesinde óz tańdaýyn jasady. «Maǵan erteńgi kúni múddemdi kimniń qorǵap, óńirdegi máselelerdi qalaı sheshetini mańyzdy. Sol úshin de partııalar men kandıdattardyń baǵdarlamasyn aldyn ala qarap aldym. Durys tańdaý jasadym dep oılaımyn», deıdi boıjetken.
Jalpy, bul kúni saılaýshylardyń barynsha belsendi bolǵanyn baıqadyq. Turǵyndarǵa ala tańnan tútep soqqan boran da kedergi bola almady. Túski mezgildiń ózinde tizimdegi daýys berýshilerdiń 52 paıyzy daýys berip úlgergenine kýá boldyq. Al baıqaýshylar men qoǵamdyq ınstıtýttardyń ókilderi saılaý ýchaskelerindegi daýys berý prosesteri barynsha júıeli uıymdastyrylǵanyn atap ótti.
Pavlodar oblysy
