Búginde Ádiletti Qazaqstan qurýǵa, oń ózgeris jasaýǵa septigi tıip, úni jeter degen úmitkerdi tańdap, saılaýǵa qyzyǵýshylyq basym. Ony daýys berýge bet alǵan azamattar qarasynan aıqyn ańǵarýǵa bolady.
– Biz bolashaǵymyzdyń jarqyn, jaǵdaıymyzdyń jaqsy bolaryna senemiz. Kópbalaly analardyń, jalpy qazaqstandyq áıelderdiń áleýmettik turmysyn jaqsartyp, zeınetke shyǵýyn tómendetip, baspanamen qamtamasyz etilýine ózgerister jasalatyn shyǵar. Sebebi, kandıdattardyń saılaýaldy baǵdarlamalarynda osyndaı ýádeler kóp aıtyldy. Búgin depýtat bop saılanatyn azamattardyń ýádeleri oryndalar bolsa shynymen de halyqtyń jaǵdaıy jaqsarary sózsiz. Men soǵan sendim, ózim qalaǵan kandıdatqa daýysymdy berdim, – deıdi Talǵar qalasyndaǵy №3 orta mektepte ornalasqan №837 saılaý ýchaskesine baryp, tańdaýyn jasaǵan 12 balanyń anasy Gúlnáz Nurdildáqyzy.
Elimizdiń aıbynyn asyryp, mártebesin kóterý jolynda qyzmet eter halyq qalaýlylaryna tańdaý jasalatyn saıası mańyzy zor sátti qalt jibermeı, óz úlesin qosýdy azamattyq paryz sanaǵan saılaýshylar tańnan keshke deıin óz saılaý ýchaskelerine baryp, daýys berýdi jalǵastyrdy.
Saılaýǵa Qonaev garnızonyna qarasty áskerı bólimderde qyzmeti men boryshyn atqaryp júrgen 5 myńnan astam jaýynger de qatysty. Ofıserler, kelisimshart boıynsha áskerı qyzmetshiler jáne olardyń otbasy músheleri turǵylyqty jeri boıynsha saılaý ýchaskelerinde daýys berdi. Bir mezgilde birneshe áskerı bólimniń merzimdi áskerı qyzmetshileri úshin desanttyq-shabýyldaýshy brıgadanyń aýmaǵynda saılaý ýchaskesi uıymdastyryldy. Olardyń qatarynda birinshi ret daýys bergender de bar. Solardyń biri – qatardaǵy jaýynger Danıl Ivanıskıı.
«Bıyl saılaýǵa alǵash ret qatystym. Men maqtanyshpen daýysymdy qýatty, turaqty, gúldengen el úshin, bolashaqqa senim úshin berdim. Saılanatyn depýtattar memleketimizdiń odan ári damyp, órkendeýine laıyqty úles qosatynyna senimdimin», deıdi jaýynger.
Ulbosyn ISABEK,
jýrnalıst
Almaty oblysy
