Jeli qoldanýshylarynyń aıtýynsha, jer silkinisi sezilip, páterde lıýstra shaıqalǵan.
«Adamdar dúrligip ketti. Biz tórtinshi qabatta turamyz, kúıeýim jumysta bolǵan. Men tórt balammen jalǵyzbyn. Bireýi áli shaqalaq. Jer silkingende as úıde bári dirildep, qozǵalyp ketti. Bir-eki mınýttaı shaıqaldy. Syrtqa shyǵýǵa kórshiler kómektesti. Lıftke kirmeı, baspaldaqpen tústik», dedi Shymkent qalasynyń turǵyny Azıza.
Seısmologtar Taraz ben Shymkent qalasynda 3 baldyq jer silkinisi tirkelgenin aıtty.
Sodan keıin «Seısmologııalyq tájirıbelik-ádistemelik ekspedısııa» JShS Almaty, Astana, Qyzylorda qalalarynda jáne Túrkistan oblysynda 2 baldyq jer silkinisi sezilgenin habarlady.
«MSK-64 shkalasy boıynsha Shymkent, Taraz qalalarynda zilzalanyń sezilýi 3 baldy qurady. Almaty, Astana, Qyzylorda qalalarynda jáne Túrkistan oblysynda 2 baldyq jer silkinisi sezilgen», delingen habarlamada.
Sondaı-aq О́zbekstan, Qyrǵyzstan, Tájikstan, Úndistan aýmaqtarynda da jer silkinisi baıqalǵan.
