О́ńirlik densaýlyq saqtaý basqarmasynyń málimetinshe, náreste dúnıege kelgende onyń óńeshiniń durys damymaǵany, aınalshyq sańylaýynyń bolmaýy jáne tik isheginiń ádettegiden ósip ketkeni baıqalǵan. Dárigerler balany birden perınataldyq ortalyqtan oblystyq balalar aýrýhanasyna jetkizip, jedel túrde operasııa jasady.
– Dárigerler operasııa barysynda sábı óńeshiniń tómengi jaǵyn asqazanmen baılanystyryp, tik ishek arqyly aınalshyq sańylaýyn jasady. Qazirgi kúni aǵzanyń ómirlik mańyzdy qyzmetteri qalpyna kelip, sábı ózin jaqsy sezinip jatyr. Balanyń ómirine tóngen qaýip joq, – deıdi basqarmanyń baspasóz hatshysy Maqpal Qarjaýbaı.
Medısına qyzmetkerleriniń aıtýynsha, pedıatrııadaǵy óńeshtiń biteýligi týabitti aýrýlardyń ishindegi eń aýyr túrlerine jatady. Hırýrgııalyq operasııa jedel túrde jasalmasa, aǵzanyń ómirsheńdigin saqtap qalýǵa múmkindik bola bermeıdi. Mundaı aýytqýlar medısınalyq kómek der kezinde kórsetilmese, sábılerdiń ólimine alyp keledi. Iаǵnı operasııa alǵashqy 36 saǵat ishinde júrgizilýi kerek. О́ńesh biteýligi jańa týǵan balalardyń 0,1-0,4 paıyzynda kezdesedi eken. Al aınalshyq aýytqýy 5 myń sábıdiń bireýinen tabylýy múmkin. 2021 jyly oblystyq balalar aýrýhanasynda óńesh biteýligi boıynsha – 1, al byltyr 5 jaǵdaı tirkelipti.
Jalpy, balanyń túrli aýytqýmen dúnıege kelýi kóbine anasynyń densaýlyǵyna jáne jaǵymsyz ekologııalyq jaǵdaıǵa baılanysty ekenin aıtady aq jeleńdiler. Máselen, Densaýlyq saqtaý mınıstrligi usynǵan resmı statıstıkaǵa súıensek, Pavlodar oblysynda temirtapshylyqty anemııa dıagnozy qoıylǵan júkti áıelderdiń úlesi 48,4 paıyzdy quraǵan. Bul kórsetkish boıynsha óńirimiz respýblıkada ekinshi orynda tur. Dárigerler júktilik kezinde durys kútinbeý, jetkilikti tamaqtanbaý, zııandy ádetterge jol berý balanyń týabitti aýytqýshylyǵyna aparyp soǵatynyn eskertedi.
Pavlodar oblysy
