Aıta keteıik, bizdiń Ulttyq qurama Úndistanda 6 júldege (2 kúmis pen 4 qola) qol jetkizip, jalpy esepte 8-orynǵa turaqtady. Asa aýyr salmaqtaǵy (+81 kg) Ləzzat Kúngeıbaeva men Karına Ibragımova (57 kg) fınalda qarsylasyna jol berdi. Al Alýa Balqybekova (48 kg), Nadejda Rıabes (66 kg), Valentına Halzova (75 kg) men Farıza Sholtaı (81 kg) óz salmaǵynda úzdik úshtikti túıindedi. Áıelder quramasy álem chempıonatynda osyǵan deıin munsha medal jeńip almaǵan edi.
Byltyr Ystanbuldaǵy álem chempıonatynda kúmis júldeger atanǵan Alýa Balqybekova jýrnalısterge bergen suhbatynda aldaǵy jarystarǵa myqtap daıyndalatynyn aıtty.
«Bir jyl buryn Túrkııada ótken chempıonatta kúmis júldeger atanǵanmyn. Osy joly Úndistanda qola medal buıyrdy. Kóbi burynnan qolǵap túıistirip júrgen tanys qarsylastar. Jartylaı fınalda úndistandyq boksshymen kezdestim. О́te tartysty kezdesý boldy. О́kinishke qaraı, tóreshilerdiń sheshimimen qarsylasym fınalǵa shyqty. Aldaǵy ýaqytta elimizde 4 jyla bir keletin jazǵy Spartakıada ótedi. Odan bólek, Azııa oıyndary kele jatyr. Endi osy jarystarǵa daıyndalamyz», dedi Alýa Balqybekova.
«Álem chempıonatynda qola medal jeńip alý – men úshin jaqsy kórsetkish. Bokspen aınalysyp júrgenime 12 jyl boldy. Qazir jasym 22-de. Úndistanda 4 jekpe-jek ótkizip, úsheýinde uttym. Barlyq kezdesý qıyn ótti. Osal qarsylas bolǵan joq. Jartylaı fınalda sál sáttilik jetispedi. Bapkerlerime raqmet aıtamyn», dep aıtty Nadejda Rıabes.
Almatyǵa jetken bette boksshylar óz qalalaryna attanyp ketti. Álem chempıonatynde el namysyn qorǵaǵan elordalyq Ləzzat Kúngeıbaeva, Valentına Halzova, Rıma Volosenko men Aıda Ábikeevany áýejaıdan týystary, dostary, Sportty damytý dıreksııasy men Astana qalasy sport basqarmasynyń qyzmetkerleri ystyq yqylaspen kútip aldy.
