ASTANA. 30 maýsym. Búgin túnde Brazılıa qalasynda Fransııa jáne Nıgerııa quramalary arasynda 1/8 fınaldyq oıyn oınalyp, ol fransýzdardyń 2:0 etip jeńýimen aıaqtaldy. Bul týraly egemen.kz habarlady.
Match Fransııa quramasy úshin ońaılyqqa túsken joq. Nıgerııalyqtar qarsylastarynan bir de tómen óner kórsetken joq. Eki komanda búkil kezdesý boıyna keskilesken kúres júrgizdi. Munda tipti afrıkalyqtardyń dopqa kóbirek ıelik etip turǵany da anyq baıqalyp turdy.
Fransııa – Nıgerııa 2:0 (0:0).
30 maýsym. Brazılıa. Ulttyq stadıon. 67 882 kórermen. Tóreshi - Mark Geıger (AQSh).
Fransııa: Ýgo Lorıs, Mate Debıýshı, Rafael Varan, Loran Koselnı, Patrıs Evra, Pol Pogba, Ioan Kabaı, Blez Matıýıdı, Mate Valbýena (Mýssa Sıssoko, 90+4), Olıve Jırý (Antýan Grızmann, 62).
Nıgerııa: Vınsent Eneama, Efe Ambroýz, Djozef Iobo, Djývon Oshanıva, Kennet Omerýo, Ahmed Mýsa, Odjenı Onazı (Rýben Gabrıel, 59), Djon Obı Mıkel, Vıktor Mozes (Ýche Nvofor, 89), Pıter Odemvıngıe, Emmanýel Emenıke.
Goldar: Pol Pogba (79), Djozef Iobo (90+2-avtogol).
Eskertý: Blez Matıýıdı (54).
Degenmen, oıynda qaqpaǵa qaýip tóndirgen sátter de onsha kóp bola qoımady. Osynyń oraıynda fransýzdardyń ótkirirek qımyldaǵandary da kúmán týǵyzbady. Olardyń qorǵanysta barynsha akademııalyq stılde oınap, shabýyldaǵy áreketteri jattandy kóringesin, nıgerııalyqtar olardyń betterin udaıy sátti qaıtaryp otyrdy. Osydan keıin Dıde Desham taktıkalyq shemany ózgertýge májbúr boldy, Bul Karım Benzemany shabýyldyń ótkir shebine shyǵaryp, Antýan Grızmandy sol qanatqa qoıdy. Oıynnyń qyzyp sala berýine osy ózgeris qatty áser etti. Fransııa quramasynyń joryqtary óktem de ótkir bola tústi. Buǵan qosa is-qımyldyń jumbaqtyǵy qarsy alań betinde naǵyz dúrbeleń týǵyzdy. Esepti 79-mınýtta Pol Pogba ashty. Al kelesi gol oıyn aıaqtalyp qalǵan shamada, 92-mınýtta soǵyldy. Ony nıgerııalyq Djozef Iobo óz qaqpasyna túsirip aldy.
Osylaısha Fransııa shırek fınalǵa bettedi. Ol endi 4 shilde kúni Germanııa – Aljır komandalarynyń jeńimpazymen kezdesedi.
Damır Qojamqul.
Derekkóz: egemen.kz.
Foto: Sportbox.ru.
