Oral qalalyq kitaphanalar júıesi uıymdastyrǵan kezdesýge qalalyq bilim berý basqarmasyna qarasty mektep dırektorlary men tárbıe isi jónindegi orynbasarlary, jergilikti zııaly qaýym ókilderi, oqyrmandar qatysty. Jańa shyǵarmanyń ereksheligi bar, otbasyndaǵy 30 sabaq eki bólikten – ata-anaǵa arnalǵan ádistemelik kitaptan jáne balaǵa arnalǵan jumys dápterinen turady.
– Balalarmen kún saıyn kezdesip júrip túsingenim – eń aldymen ata-anamen áńgimelesip, ata-anasyn daıyndaý qajet eken. Balanyń dúnıetanymyn qalyptastyrý, sózdik qoryn damytý, bala boıyna adamgershilik qundylyqtaryn darytý – aldymen ata-ananyń mindeti. Sondyqtan qundylyqty ári mıdy damytatyn quraldy jasap shyqtyq, – deıdi Áıgerim Qaldybekqyzy.
Jańa kitaptyń tusaýyn aqyn ári ustaz, Jazýshylar odaǵynyń múshesi Darıǵa Ǵazezqyzy, ardager ustazdar Tilektes Baıqadam men Marjan Aqmetqalıqyzy kesti. Oral qalasy mádenıet jáne tilderdi damytý bóliminiń basshysy Serik Erbolatuly jas urpaqtyń damýyna yqpal etetin dúnıelerdi árdaıym qoldaıtynyn aıtty.
Atalǵan eńbekte qazaq halqynyń ulttyq ónerine erekshe oryn berilgen eken. Sonyń ishinde halyq ánderi men kúıleri týraly aıtylyp, olardyń tarıhy baıandalǵan. Osy kitaptyń tanystyrylymyna Oral qalalyq ardagerler klýbynyń «Babalar úni» dombyra ansambli men «Asyl áje» vokal toby jáne D.Nurpeıisova atyndaǵy balalar saz mektebiniń oqýshylary arnaıy kelip, kitapqa jazylǵan birneshe án men kúıdiń tarıhyn áńgimeleı otyryp, oryndaǵany erekshe kórinis boldy.
– Kórip júrmiz, XXI ǵasyrdyń basynda otbasy ınstıtýty álsirep ketti. Kónekóz qarııalar azaıǵan soń dastarqan basynda ónegeli áńgime aıtyp, sóz ustaıtyn jan sıredi. Ata-ana balasyna ne áńgime aıtyp bererin bilmeı taýsyldy. Búgingi balanyń kókiregin smartfondaǵy arzan ázil-qaljyń toltyryp júr. Osy tusta «Otbasy hrestomatııasy» qoǵamdyq qory shyǵarǵan bul quraldyń mańyzy erekshe, – deıdi osy is-sharanyń júrgizýshisi, jas ǵalym Jandos Hamza.
Batys Qazaqstan oblysy
