Tarbaǵataıdyń jomarttary

Qarap otyrsaq, aınaldyrǵan eki-úsh jyl ishinde jasaǵan jaq­sylyqtary az emes eken. Muqtaj jandardy azyq-túlikpen qamtyp, usaq-túıek áleýmettik kómek kór­setip otyrǵandary bylaı tursyn, kóptep-kómektep, turǵyn úıge deıin turǵyzyp bergen. Biraq qaıy­rymdylyqtaryn jarnamalap, keýde soǵý olar úshin jat. Áıtpese, bes lıtr suıyq maı aparyp, áleýmettik jelige bes bet post jazyp júrgen mekemelerdi de bilemiz. Olardyń qasynda Tarbaǵataıdyń qamqor azamattary qarapaıym. Esep úshin emes, el úshin eńbek qylýdy jón kóredi. Úndemeı-aq úlken is tyndyryp, aǵaıyndardyń alǵysyna bólenip júr.

«Jaqsynyń jaqsylyǵyn aıt, nury tasysyn» dep, atqaryp jatqan ıgi sharýalary jóninde baspasóz betinde jarııalaýǵa nıet­tenip, «Tarbaǵataıdyń jomart jandary» qory múshelerin áńgimege tartqanbyz. Áýelde tar­tynshaqtady, qajeti joq desti. Durys ǵoı, «oń qolyń bergendi sol qolyń kórmesin» degen bar. Dese de, bireýge bolmasa, bireýge oı salyp, úlgi bolary anyq.

– «Tarbaǵataıdyń jomart jan­dary» qory quryla sala qar­­jy quıyp, maqsatty túr­de aýdan halqyna kómek kór­sete bas­­tadyq. Árıne, aıaq-qo­ly bal­ǵadaı, eńbekke jaramdy aza­mat­tarǵa emes, kómekke shynaıy zárý adamdarǵa qolushyn sozyp júr­miz, deıdi jomart jandardyń biri, kásipker Abzal Toqtarǵazın.

Ár salada jumys istep júrip, keıin kásipke ketken Abzal az qamtylǵan otbasylarǵa únemi jár­demdesedi. Birde azyq-túlik­teı berse, endi birde aqsha­laı kómek kórsetedi. Kerek-ja­raq­taryn jetkizip beredi, úı-jaı­laryn jóndeıdi. «Tarba­ǵataıdyń jomart jandary» qory birlesip, aýyldaǵy jalǵyzbasty azamatqa úı de kóterip bergen. Aldyn ala qor músheleri úıiniń turýǵa jara­maıtynyn anyq­taǵan, aqyl­dasqan. Sonymen qatar aza­mat­tyń kómekke shynaıy muq­taj ekenine de kóz jetkizgen. Jal­ǵyzbasty, onyń ústine qandaı da bir dertke shaldyqqan. Alaıda memleketten kómek ala almaıdy. Onyń sebebi eshqandaı sanatqa jatpaıdy eken. Sóıtip, Abzal Toqtarǵazın qor múshesi retinde janashyrlyq tanytyp, muqtaj azamatqa laıyqtap, shaǵyn úı salyp beredi. Turmysyna yń­ǵaıly bolsyn dep sýyna deıin tart­qyzady. Bir anyǵy, ol ja­rııaǵa jar salmaı-aq kómek jasady. Búgingi kúnge deıin Abzaldyń márttigin aýyldastary bolmasa, syrt kóz onsha bile bermeıdi.

– Biz kómek kórsetkennen, tıyn-tebenimiz kemip qalmaıdy. Kerisinshe, qudaı eki eselep be­redi. Ekinshiden, kishige qamqor­lyq, úlkenge qurmet kórsetý – áý basta áke-shesheniń bergen tár­bıesi. Az qamtylǵandar kóp ǵoı. Kómek­tesemiz. Biraq aıta ber­meımiz, deıdi Abzal Almazuly.

Abzaldyń aıtýynsha, bıyl Tarbaǵataı aýdany, Asýsaı aýylyna kúmbezin kók tiretip, meshit salýdy josparlap otyr. Shekara boıynda jatqan aýyldyń qazirgi meshiti eskirgen eken.

– Bıyl Asýsaıǵa jańa meshit salyp berýdi oılastyryp otyrmyz. Aýylda bes ýaqyt azan sha­qy­rylyp jatsa, menmundalap meshit tursa, halyqtyń rýhy kó­teriler edi. Onsyz da halyq kó­ship, shekara mańy bos qalyp jatyr. Sondyqtan joba-josparyn jasap, meshittiń qurylysyna kirisip ketetin shyǵarmyz, degen de oıyn aıtty.

Odan bólek, «Tarbaǵataıdyń jomart jandary» qory aýdannyń ónerpazdaryna, sportshylaryna da únemi qoldaý kórsetip, qol­pashtap otyrady. Al baspanamen qamtý sekildi demeýshilik kó­­mekter bir ǵana azamatpen shek­­telip qal­maǵan. Aıta bersek, az emes. Onyń bárin tizip shy­ǵýdy qorǵa qarjy quıyp júr­gen aza­mat­tar ashyp aıtýdy jón kór­medi. Eń bastysy, aýdannyń janashyrlary bar. Osyn­daı aýyz­birshilik, bereke ár aýylda, ár aýdanda bolsa, qazaq baı bolady.

Shyǵys Qazaqstan oblysy,

Tarbaǵataı aýdany