Dál sol 29 jastaǵy Qap taýynyń qyrany osydan tórt jyl buryn Máskeýde jalaýy jelbiregen Fight Nights Global 93 jarysynda Hamıtovty upaı sanymen utqan edi. Jalpy, bul sportshy aralas jekpe-jekti serik etkeli 10 jyldan asa ýaqyt ótti. Sol aralyqta Abbasov 32 kezdesý ótkizip, 28 ret jeńiske jetti. 17 básekede aıqyn basymdyq tanytty. Ol tek 2014 jyly Ibragım Tıbılov (sabmıshn) pen Shota Ahýlashvılı (upaımen), 2016 jyly Magomedsaıgıd Alıbekov (upaımen) jáne 2022 jyly Ismael Bonfımge (upaımen) ǵana ese jiberdi. Ásirese, 2017-2022 jyldar Narıman úshin óte tabysty boldy. Sol bes jyl aralyǵynda 13 márte oktagonǵa shyqqan ázerbaıjandyq sportshy barlyq básekede jeńiske jetti. Biraq ol óziniń karerasyndaǵy basty jekpe-jeginde jeńilistiń kermek dámin tatty. Byltyr kúzde Las-Vegasta uıymdastyrylǵan Dana White Contented Series týrnırinde ol brazılııalyq Ismael Bonfımdi utqanda UFC-men kelisimshartqa otyratyn edi.
Jalpy, Narıman Abbasovtyń sporttyq mansabynda jarqyn jeńister az bolǵan joq. Ol Qýat Hamıtovtan bólek, qazaqtyń taǵy bir tanymal sportshysy Ábil Boranbaevtan basym tústi. Sondaı-aq Ázerbaıjannyń ókilinen «taıaq jegender» arasynda Aleksandr Býtenko, Ýmar Tagırov, Shámil Ámirov, Shámil Zavýrov jáne Marıf Pıraev bar. Kezinde Abbasov Fight Nights Global promoýsheniniń altyn belbeýin de ıelendi.
«Naımanǵa» keler bolsaq, onyń jasy – 35-te. Almaty oblysy Alakól aýdanynyń týmasy jastaıynan grek-rım kúresin serik etti. Qýat 2011 jyldan beri aralas jekpe-jekten ótken jarystarda kúsh synasyp júr. Sol kezden beri 31 márte aıqas alańyna shyǵyp, 23 ret jeńis toıyn toılady. 18 kezdesýdi merziminen buryn aıaqtady.
