Alǵash ret 6 partııa ókili zań shyǵarýshy organnyń 69 mandatyna ıe boldy. Arasynda jetinshi shaqyrylymda Parlament minberinen ózekti máselelerdi kótere bilgen Qazybek Isa men Erlan Saırovtyń partııa tizimi arqyly mandatqa qaıta ıe bolǵany qýantady. О́ıtkeni olardyń buǵan deıin ultqa qatysty máseleler týraly talaı depýtattyq saýal joldaǵandaryn kóz kórip, qulaq estidi.
Májiliske partııa tizimimen halyqqa súıkimi bar Ashat Aımaǵambetovtiń ótkenin jurt áleýmettik jelide qýana jazyp jatyr. Halyq aıtsa, qalt aıtpaıdy. Jas bolsa da, senim mandatyna ıe bolǵan azamat. Endi halyq qalaýlysy retinde osy senimdi aqtaı ala ma, joq pa, oǵan da ýaqyt tóreshi.
Birmandatty okrýgter boıynsha saılanǵan depýtattar arasynda Ermurat Bapı, Muqash Eskendirov pen Gúldara Nurymovany erekshe atar edim. Alǵashqysy shyndyqty shyrqyrata aıta aldy, «Dat» jobasymen shyǵarǵan gazetteri ózekti taqyryptardy batyl kótere aldy. Sol úshin gazetteri talaı jabyldy. Onda da qaıtqan joq. Oǵan kúmán keltirgender «Dattyń» burynǵy men búgingi tigindilerin qarasa bolady. Jambyl oblysynan saılanǵan sońǵy ekeýi rasynda halyq qalaýlysy. Jerlesterimniń basym bóligi saılaýda olarǵa daýys berdi. Senim bildirdi. Muqash Zulqarnaıuly syldyr sózdiń emes, naqty istiń adamy ekenin baıaǵyda-aq dáleldep qoıǵan. Al Gúldara Aldanyshqyzy jetinshi shaqyrylymda «halyq qalaýlysy» atyna ábden laıyq ekenin kórsetti. О́z salasy sanalatyn medısına máselesin talaı kóterdi. Qury kóterip qana qoıǵan joq, onyń sheshilýine de azdy-kópti úles qosty. Segizinshi shaqyrylymda da solaı bolatynyna kúmán joq.
Árıne, kimniń kim ekenin ýaqyt kórsetedi. Tek 98 depýtat halyq seniminen artyq baǵa joq ekenin umytpaı, turǵyndardyń turmysyn túzeıtin zańdardyń qabyldanýyna yqpal etse bolǵany.
Jasulan MÁÝLENULY,
«Qazaq» gazetiniń bas redaktory
