Sharaına
Soltústikkoreıalyq taraptyń úndeýinde KHDR-diń Ońtústik Koreıaǵa qarsy úgit-nasıhat jumystaryn ýaqytsha toqtatýǵa daıyn ekeni atap kórsetiledi. Sóıtip, Ońtústik Koreıa tarapynan da osyndaı jaýap qadam kútiletini jasyrylmaıdy. Osy aralyqta, KHDR kósemi Kım Chen Yn kez kelgen ádis-tásil arqyly Koreıa halyq armııasynyń qorǵanys kúshterin jedel bekemdeý qajettigi týraly málimdep úlgerdi. Onyń málimdeýinshe, berik beıbitshilikke belgili bir tarap asa kúshti bolyp, oǵan eshkim qarsy shyǵa almaıtyn jaǵdaıda ǵana qol jetkizýge bolady.
Qysqa qaıyryp aıtqanda:
AQSh-tyń Los-Andjeles qalasyndaǵy meıramhanalardyń birinde uıymdastyrylǵan demalys keshinde qylmysker sondaǵy adamdarǵa oq jaýdyrsa, bir adam qaza taýyp, tórteýi jaralanǵan. Oqıǵa jergilikti ýaqyt boıynsha tańǵy saǵat 5.00-de tirkelgen. Qarý jumsaǵan adamnyń osy keshtiń qonaǵy bolǵany-bolmaǵany anyqtalyp jatsa kerek.
Úndistannyń Mýmbaı qalasynda qulaǵan úıdiń astynda qalyp, qaza tapqandar sany 60-tan asty. Qutqarýshylar tiri qalǵandardy izdeý úderisin aıaqtady. Úıindiler astynda taǵy da birneshe múrde qalýy múmkin. Aldyn ala derek boıynsha, úıdiń qulaýyna zańsyz qaıta josparlaý sebep bolǵan. Polısııa kúdiktini tutqyndap úlgergen.
Bolgarııa prezıdenti Rosen Plevnelıev keshe parlamentti taratyp, ýaqytsha úkimet taǵaıyndaý nıeti bar ekenin habarlady. Prezıdent mundaı ustanymǵa saıası partııalardyń serkelerimen uzaqqa sozylǵan kelissózderdiń qorytyndysynda kelgen. Endi osy eldegi saıası partııalar kezekten tys parlament saılaýyn 5 qazanǵa belgilepti.
Magnıtýdasy (jerdiń astyndaǵy qýaty) 6,2 baldyq jer silkinisi Japonııanyń Ivodzıma aralynda tirkeldi. Silkinistiń epısentri araldyń ońtústik-shyǵysyna qaraı 167 shaqyrymda bolǵan. Sýnamı qateri joq delinip otyr. Al araldyń ózinde halyq turaqty turmaıdy eken.
Reseıdiń Tótenshe jaǵdaılar mınıstrliginiń ushaǵy ótken jeksenbi kúni Úndistandaǵy jol-kólik oqıǵasynan zardap shekken 5 reseılikti Máskeýge jetkizgen. Ishinde 13 reseılik týrıst bar avtobýs 10 maýsym kúni Ýttarkhand shtatynyń taýly jolynda ózenge qulaǵan edi. Oqıǵa ornynda eki reseılik qaza tapsa, bireýi iz-túzsiz joǵalyp ketken-tin.
Iraktyq ıslamıster halıfat qurady
Irak pen Sırııa aýmaǵynyń bir bóligin jaýlap alǵan «Irak pen Levanttyń ıslam memleketi» radıkaldy toby halıfat quratyndyqtaryn jarııa etti. Bul týraly «Reıter» agenttigi aqpar taratty. Olardyń málimdemesinde top ókilderi búkil álemdegi ıslamısterdi halıfatqa senimdilik tanytýǵa shaqyrdy.
Osylaısha, «Irak pen Levanttyń ıslam memleketi» budan bylaı qaraı ózin «Islam memleketi» dep ataý nıeti bar ekenin bildirdi. Halıfattyń bıleýshisi atalǵan toptyń serkesi Ábý Bakar ál-Baǵdadı dep jarııalandy. «Irak pen Levanttyń ıslam memleketi» qarýly jasaǵy maýsym aıynyń basynda Irakta shabýylǵa kóship, osy eldiń soltústik-batysyna baqylaý ornatqan edi. Olardyń endigi maqsaty – Baǵdatty shabýyldaý.
Aýǵanstanda ajal qusha jazdady
Rýmynııa premer-mınıstri Vıktor Ponta Aýǵanstanǵa sapary kezinde qarýly jasaq atqylaǵan zymyran oqtarynyń astynda qaldy. Lańkester NATO-nyń Kandagar provınsııasyndaǵy áskerı bazasyna shabýyl jasaǵan bolatyn.
Sol kezde Býharesten kelgen delegasııa Rýmynııa kontıngentin Aýǵanstannan shyǵarýǵa arnalǵan sharalarǵa qatysyp jatqan edi. Delegasııa quramynda Pontadan bólek Rýmynııanyń qorǵanys mınıstri Mırcha Dýsha men vıse-premer Gabrıel Oprıa bar. Shekpendiler amalsyzdan býnkerge túsýge májbúr bolǵan. Bir jaqsysy, shabýyldan eshkim de zardap shekpegen. Býharest óziniń áskerin Aýǵanstanǵa bitimgerlik mıssııasy aıasynda 2002 jyly attandyrǵan bolatyn. Qazirgi kezde Aýǵanstanda shamamen 2000 áskerı qyzmetshi qalyp otyr.
Tórt kúnde 160 tutqyn óltirilgen
«Irak pen Levanttyń Islam memleketi» qarýly jasaǵy Iraktyń Tıkrıt qalasynda sońǵy tórt kún ishinde kem degende 160 tutqyndy óltirgen. Bul týraly halyqaralyq quqyq qorǵaý uıymynyń baıandamasynda aıtylady.
Quqyq qorǵaýshylar spýtnıkterden alynǵan málimetterdi saraptaı kele, Iraktyń eki qalasynda 11-14 maýsym aralyǵynda tutqyndaǵylardy jappaı óltirý júzege asyrylǵan degen qorytyndy jasaǵan. Olardyń habarlamalarynda qurbandyqtar sany aıtarlyqtaı kóp bolýy da múmkin delinip otyr. О́ıtkeni, qazirgi kezde tolyqtaı tekserý júrgizý múmkin emes kórinedi.
Internet materıaldary negizinde ázirlendi.
