Jas matematıkter, ınformatıkter, fızıkter, hımıkter jáne geograftar jeke jáne komandalyq esepte jetken jetistikterimen NIS-tiń joǵary standarttaryn qaıta rastady. Zııatkerlik mektepterdiń medaldar qorjyny 60-tan astam túrli dárejedegi nagradamen tolyqty. Olardyń úshten biri – altyn. NIS ókilderiniń barlyǵy derlik qurmet tuǵyrynan kórindi.
Elimizdiń úzdik fızıgi ataǵyn Almatydaǵy fızıka-matematıka baǵytyndaǵy Zııatkerlik mekteptiń oqýshysy Ersultan Pitebaı aldy. Jaqynda ǵana ony kópshilik bedeldi joǵary oqý oryndarynyń álemdik reıtınginde kósh bastap turǵan Massachýsets tehnologııalyq ınstıtýtyna shaqyrtý alyp, grantyn ıelenýimen quttyqtaǵan bolatyn.
Olımpıadanyń kúmis júldegeri, 2023 jylǵy túlekterdiń juldyzdy komandasynyń múshesi Almıra Nurlanova da Massachýsets tehnologııalyq ınstıtýtynyń grantyn ıelendi.
О́tken jyly geografııa páninen halyqaralyq IGeO olımpıadasynyń jeńisti marafonyn jalǵastyrǵan Sanjar Hamıtov Aqtóbe qalasyndaǵy NIS-ti kezekti altyn medalimen qýantty.
Birinshi oryn ıelengen Zııatkerlik mektepter ókilderiniń qatarynda semeılik Muhammadırıf Sahmoldın, NIS halyqaralyq bakalavrıattan Aıda Davletova, elordadaǵy fızıka-matematıka baǵytyndaǵy NIS oqýshysy Sanjar Bısenáli bar. Olar halyqaralyq bedeldi olımpıadalarda el abyroıyn asqaqtatyp keledi.
Eń kóp medaldi Almatydaǵy fızıka-matematıka baǵytyndaǵy Zııatkerlik mektep men Pavlodardaǵy NIS oqýshylary enshilegen.
Zııatkerlik mektepterdiń respýblıkalyq olımpıadadaǵy jańa jarqyn jeńisi NIS-tiń akademııalyq jetistikteriniń jalǵasyna aınaldy.
