Kókshetaýda úı qurylysyna qajetti ónim shyǵaratyn jańa zaýyt ashyldy

ASTANA. 1 shilde. Kókshetaý qalasynda  qurylys materıaldaryn shyǵaratyn jańa zaýyt iske qosyldy. Bul týraly «24kz» habarlady. «Údemeli ındýstrıaldy-ınnovasııalyq damý» baǵdarlamasy aıasynda salynǵan óndiris ornynyń jobalyq quny 1 mlrd. teńgeni qurap otyr. Kásiporyn ashylǵan sátte birden 70 adam jumysqa ornalasqan. Jalpy aýmaǵy 7 000 sharshy metrdi alyp jatqan kásiporyn ónim kólemi ulǵaıǵan saıyn jumysshylar sanyn 100-ge jetkizýdi josparlaýda. Zaýyt tolyq avtomattandyrylǵan. Kásiporyn dırektory Aleksandr Dvorsevoı: «Táýligine 300 metr plıta shyǵaramyz. Onyń ishinde úıdiń irgetasyna arnalǵan betondar, qabyrǵalar jáne tóbesin jabatyn betondar bar. Zaýytqa ketken qarjy jeke ózimizdiki. Memleket arnaıy jer bólip berdi jáne bankten alǵan nesıemizdiń paıyzdyq mólsherlemesin jaýyp otyr. Ázirge zaýyt ónimderi Kókshetaý qalasynyń qurylystaryna jumsalýda. Suranys joǵary», – dedi. Zaýyt basshylary otandyq qurylys zattaryn kóptep shyǵarý elimizdegi turǵyn úı baǵasyn tómendetýge jol ashady dep esepteıdi. Olar kelesi jyldan bastap 9 qabatty paneldi úıler salýdy qolǵa almaq. Joldybaı Bazar. Derekkóz: «24kz». Foto: «24kz».