Aımaqtar • 30 Naýryz, 2023

Aqtóbe turǵyndary evakýasııalanyp jatyr

223 ret

kórsetildi

1 mın

oqý úshin

Aqtóbe qalasynda Qarǵaly ózeni kóterilip, 100-ge jýyq adam evakýasııalandy, dep habarlaıdy Egemen.kz.

Botakóz BAQBERGEN

Aqtóbe aýmaǵynda ornalasqan Qarǵaly, Kúnshýaq, Munaıshy baý-baqsha ujymdaryna úlken qaýip tóndi.

Qarǵaly ózeniniń sý deńgeıi kóterilip, qala turǵyndary evakýasııalanyp jatyr.

«Oblystyq TJD qyzmetkerleri 95 adamdy evakýasııalady. Onyń 40-y bala. Qazirgi kezde bul jumys jalǵasyp jatyr. Evakýasııa jumystaryna 66/55 áskerı bóliminiń sarbazdary da jumyldyryldy», dep habarlady oblystyq TJD baspasóz qyzmeti.

Aqtóbe qalasy ákiminiń baspasóz hatshysy Aıgúl Baımenovanyń aıtýynsha, qazirgi kezde saıajaıda ornalasqan úılerdiń aýlasyn sý basqan.

«Bıyl eki ese kóp qar jaýdy. Qazir Jaman Qarǵaly ózeni tolyp, kún jylyǵanda tysqyn bolyp jatyr. Turǵyndarǵa aıtarymyz, Qarǵaly sý qoımasy ashylǵan joq. Onyń rezervi bar», dedi qala ákimi Murat Jórebekov.

Adamdar olımpıada rezervterin daıarlaý sport mektebi men kolledj jataqhanasyna ornalastyryldy.

«66/55 áskerı bóliminiń jedel batalonynyń jeke quramy atalǵan aýdandardaǵy tótenshe jaǵdaılardyń saldaryn joıýǵa jumyldyryldy. Áskerı qyzmetshiler kósheler men aýlalardy topyraq pen qummen kúsheıtti. Sonymen qatar sý basqan turǵyn úılerdiń aýlasy men joldar tazartyldy», dedi 6655 áskerı bóliminiń shtab bastyǵy Dáýren Jaǵyparov.