Naǵashylary jaǵynan da osy salada júrgender kóp edi. Sondyqtan da 1998 jyly mektep bitirgen jalaǵashtyq qyz Almatydaǵy Quqyq jáne naryq akademııasynyń stýdenti atandy. Oqý ornyn bitirip kelgenmen Jalaǵashtan jumys tabylmaı kórshiles Qarmaqshy aýdandyq ishki ister bólimine anyqtaýshy bolyp ornalasqan jas mamannyń tergeýshi bolamyn degen oıy joq edi. Bári aıaq astynan boldy. Onyń tııanaqtylyǵyn baıqaǵan basshylyq kóp uzamaı oǵan osy jaýapty qyzmetti júktedi. Alǵashqy isteriniń biri adam ólimine qatysty edi. Aýdanda «joǵalyp kettige» sanalǵan bir azamattyń denesi sýdan tabylyp, onyń oq jaraqatynan qaıtys bolǵany anyqtaldy. Marqumnyń aınalasyn zerttep kórse, bar kúdik jesirine aýyp tur. Biraq istiń anyq-qanyǵyna jetpese áıeldiń de, onyń alty balasynyń da obalyna qalmaq.
– Ol tusta oblysta ekspertıza jasaıtyn da múmkindik joq. Marqumnyń basyn qorapqa salyp, poıyzben Astanaǵa jol tarttym. Eki kúndik joldan keıin adasyp júrip, saraptama jasaıtyn ortalyqty ázer tapqanym bar. Biraq kúdigimiz tolyq rastaldy. Qaıtys bolǵan jigitke áıeli qosaýyz myltyqtan oq atqanyn moıyndady. Is tergelip jatqan tusta 6 balany balalar úıine ornalastyrdyq. Talaı márte olarǵa kezdesýge baryp, analaryn izdep shyrqyraǵan sábılerge qosyla solqyldap jylap qaıtqan kezim esten ketpeıdi, – deıdi tergeýshi.
Zaman jańarǵan saıyn kúnkóristiń amaly da kóbeıe túsetini belgili. Biraq sol amal zańnyń aıasynan aspaýy kerek. Qazir qoǵamdy alataıdaı búldirip otyrǵan alaıaqtar osydan on shaqty jyl buryn paıda bola bastady ǵoı. Qarmaqshydan Qyzylorda qalalyq ishki ister bólimine tergeýshi bolyp aýysqan Elmıraǵa sol tusta oblys ortalyǵynda salynyp jatqan jańa aýdandardyń birinen baspana alyp bermek bolyp, ózine sengen jurtty jer sıpatyp ketkenderdiń isimen aınalysýǵa týra keldi. Ańqaý jurttyń senimine kirgen ákkiler 50-60 adamnan 1 mln teńgeden jınap alyp, kilti endi berilgeli turǵan kópqabatty úıden páterlerdi ońdy-soldy «taratypty». «Ákimdikte tanysym bar», «ana bir qyzmette otyrǵan jan meniń sózimdi jerge tastamaıtyn adamym» degen alaıaqtarǵa aldanǵan jurt kóshýge qam jasap, keıbiri qonystoıyn toılap jatqanda bul baspanalardyń basqaǵa tıesili ekendigin bir-aq biledi ǵoı.
Qaı istiń de óz qıyndyǵy bolady. Dese de buryn-sońdy kezdese qoımaǵan qoıannyń jymyndaı myna isten jiptiń bir ushyn shyǵaryp alý tipti de ońaı emes edi. Elmıra uzaq oılandy, biraz izdendi. Sonyń arqasynda 50-60 epızodtan turatyn is birte-birte kitap paraǵyndaı ashylyp, qylmys aıqyndala bastady. Aqyry alaıaqtardyń qylmysy tolyq áshkerelenip, sot arqyly jazasyn aldy.
– Qalaǵa qyzmet aýystyryp kelgen kez edi. Birde qasymdaǵylar birinshi qabatta bir beıtanys adamnyń shaqyryp turǵanyn aıtyp keldi. Kezekshi bólimge jaqyndaı bere osydan 5 jyl buryn men tergegen is boıynsha sottalǵan azamatty tanydym. Sekem alsam da, syr bildirmeı sóılestim. Merziminen buryn shartty túrde bosatýǵa iligip, kelip turǵan beti eken. Amandasyp, jaǵdaıyn aıtqannan keıin keri aınalyp, kete bardy. Áýelgide qoryqqanymmen keıin mundaıǵa etim úırendi, – deıdi ol.
Tergeýshi ómirinde mundaı da bolady. Sondyqtan da bul salany adam kóńilindegi qubylystardy dóp basatyn sezimtal, basqa jannyń kózine túse bermeıtin eleýsiz jaıtty baıqaıtyn qyraǵy, qoly da, joly da taza jandar ǵana tańdaıdy.
Qyzylorda oblysy
