Shákirti ozǵan ustaz baqytty
Eńbek jolyn mektepte muǵalimdikten bastaǵan jas maman Baqytgúl Súleımenova Qostanaıǵa qonys aýdarǵan soń, jumysyn tilderdi damytý basqarmasynda jalǵastyrdy. Dálirek aıtsaq, tilderdi oqytý ortalyǵynda memlekettik qyzmetshilerge qazaq tilin oqyta bastady. Árıne, eresekterge sabaq júrgizý tájirıbesi birden qalyptasa qoımaǵany anyq. Úlkenderdi til úırenýge qyzyqtyrý úshin kóp izdenýge týra keldi. B.Súleımenova qazaq tilin oqytýdyń qyr-syryna qanyǵyp, tájirıbe jınaqtady, Til basqarmasynyń bas mamany, keıin tilderdi damytý bóliminiń basshysy deńgeıine kóterildi. Qyzmet aýqymy keńeıip, jaýapkershilik júgi arta tústi.
Baqytgúldiń jaqsy maman bolyp qalyptasýyna onyń adamı bolmysynyń da áseri bolǵanyn aıtyp ótken jón. Iskerlik qabilet kórkem minezben úılesse ǵana nátıjesi ońdy bolmaq. Áriptesteri de, aragidik qyzmet babymen jolyqqan ózge azamattar da Baqytgúl Zarlyqqyzyn tabıǵatynan bııazy, minezi kórkem, aqyryn júrip, anyq basatyn, qolǵa alǵan qaı isin de dabyra etpeı, tııanaqty tyndyratyn bilikti maman retinde tanıdy.
Baqytgúl óńirdegi memlekettik tildi jetik meńgergen ózge ult jastaryn nazarǵa alyp, únemi qoldaý bildirip otyrdy. Olardyń áleýetiniń keńeıip, qanatyn keńge jaıýyna jaǵdaı jasady. Dmıtrıı Romashenko, Alla Gavrına, Indıra Ivanova, Natalıa Ramazanova, Igor Shpak, Denıs Skorohodov sekildi qazaq tiline jetik ózge ult ókilderiniń elge tanylýyna jol ashty. Ol eńbeginiń esh ketpeı, jemisin kórip júrgenin baqytqa balaıdy. Baqyt kilti eńbekte ekenin seziný ony jigerlendirip, jańa isterge bastamashy bolýǵa jeteleıdi. Baqytyn eńbekten – tilge qyzmet etýden taýyp, memlekettik til saıasatynyń júzege asýyna ózindik úles qosyp júrgen Baqytgúl jaıly áriptesteri de jaqsy pikirde.
Osydan bir jyldan astam ýaqyt buryn Tilderdi damytý basqarmasy taratylyp, qyzmetkerleriniń birshamasy Mádenıet basqarmasynyń quzyryna ótti. Týǵan óńirde tól tilimizdiń túleýine túrli isterimen uıytqy bolǵan keıipkerimiz bolsa, Qostanaı oblysy ákimi apparatynyń áleýmettik-saıası bóliminiń basshysy bolyp taǵaıyndaldy. Jańa qyzmet – onyń eńbegine berilgen baǵa ispettes.
Bıalash SÚIINKINA,
Bilim berý isiniń qurmetti qyzmetkeri
QOSTANAI
Kóńilden shyǵatyn baǵdarlamalar
Sońǵy kezderi kógildir ekrannan jan saraıyńdy ashyp, kóńilińniń kókjıegin keńeıtetin baǵdarlamalar jıi berilip júr. Árıne, munyń ózi biz sekildi qart adamdardyń bir mezgil janyn jadyratyp, aldanysh-ermegine aınalary sózsiz.
Osy oraıda, eń aldymen, «Jibek joly» telearnasynan berilip júrgen «Jaqsy adamdarym» baǵdarlamasyn erekshe bólip atar edik. Erli-zaıypty tanymal ánshiler Qydyráli Bolman men Qaraqat Ábildına júrgizetin habar óz kórermenderiniń kózaıymyna aınalyp otyr. Osyǵan deıin ánshi, aqyn ári sazger qyzymyz Roza Álqoja men «Mýzart» ansambli jaıly berilgen baǵdarlamalary áserliligimen este qaldy. «Ulytaý» tobynyń mýzykalyq súıemeldeýi de qoıylymnyń árin ashatyndaı.
«Habar» telearnasy arqyly kórermenderimen qaýyshyp júrgen «Jup-jubymen» baǵdarlamasy da sátti oılap tabylǵan dúnıe degen oıdamyz. Belgili ázilkesh Tursynbek Qabatov pen onyń zaıyby Móldir Muqanova ekeýiniń jarasty juby júrgizýshilikke oraıymen tańdalǵan. Birin-biri ilip áketip, sátimen oryndy tolyqtyryp otyrady. Qatysýshylardyń juby da ózara tandem quryp, jastarǵa úlgi bolatyndaı-aq jandar. Muny bir men ǵana emes, basqalardyń da aıtyp júrgendigin qulaǵymyz shaldy.
О́ner álemindegi daryndy jas Táýekel Músilim balamyzdyń «Nartáýekel» kópshilik-tanymdyq baǵdarlamasyn da úlken-kishi dáıim asyǵa kútedi. Ásirese, tanym kókjıegi keń jastarymyzdyń kóbeıip kele jatqandyǵy kóńilge qýanysh sezimin uıalatady.
Qalyń kórermenge «olja salǵan» taǵy bir baǵdarlama – «Juldyzbysyń?» Buryn «Ázil álemi» ázil-syqaq teatry arqyly jurtshylyqqa jaqsy tanys ázilkesh Qaırat Álimgereı júrgizýshilik qyrymen de kórinip kele jatqandaı áser qaldyrady. Bir «áttegen-aıy», baǵdarlamaǵa qatysyp otyrǵan keıbir óner ıeleriniń ózin kógildir ekran aldynda qalaı bolsa solaı ustap, ersi qylyq kórsetýleri der edik. Munysyn olardyń ózderi baıqamaıtyn syńaıly.
Aldaǵy kezde de mádenı-tanymdyq, oıyn-saýyq baǵdarlamalarynyń kókjıegi keńeıe bersin degen bir ǵana tilegimiz bar.
Káribaı ÁMZEULY,
zeınetker
Túrkistan oblysy
Daryndy oqýshylar qatarynda
Selınograd aýdany Aqmol aýylyndaǵy orta mekteptiń birneshe oqýshysy «Jańa Qazaqstannyń 100 daryndy oqýshysy» atty respýblıkalyq baıqaýǵa qatysty. Atap aıtqanda, Dastan Orynbasar, Dámeli Mıran, Aılana Ydyrys, Mádına Baıraq, Gúljamal Baıraq, Janasyl Abdyǵalı baıqaýǵa aparǵan eńbekterin kórsetip, jetken jetistikterin pash etti.
Baıqaýdy «Bilim-òrkenieti» ulttyq ınnovasııalyq ǵylymı-zertteý ortalyǵy uıymdastyrdy. Atalǵan is-shara elimizde alty jyl qatarynan ótkizilip keledi. Maqsat – Otanymyzdaǵy daryndy jastar arasynda baılanys ornatý, oqýshylardyń ǵylymı áleýetin kúsheıtý, ınnovasııalyq ıdeıalaryn keńeıte otyryp úzdikterin anyqtaý.
Atalǵan baıqaý aıasynda «Jańa Qazaqstannyń úzdik daryndy oqýshysy» degen taqyrypta respýblıkalyq forým ótkizildi. Oǵan mártebeli meımandarmen qatar, elimizdiń barlyq óńirinen kelgen daryndy oqýshylar qatysty. Olar aǵa býynnyń aqyl-keńesin tyńdady. Ǵylym qýyp, jańashyldyqqa umtylǵan daryndy oqýshylardy aǵa býyn ókilderi marapattady.
Aqmol mektebiniń daryndy oqýshylary osy jetistikpen shektelip qalmaıdy dep senemiz.
Aıym ShOIBEKOVA,
tarıh pániniń muǵalimi
Aqmola oblysy,
Selınograd aýdany
