«Qarlyǵash» balabaqshasynyń ókilderi «Nur bala» bóbekjaı-baqshasynyń jumysymen tanysyp, balalardyń belsendi is-qımyl ortalyqtary, «Sand art» kabıneti, mobıldi kitaphana, «Ulttyq mura – qazyna» ortalyǵynda jáne psıholog kabınetinde boldy. Sondaı-aq mektepke daıarlyq tobyndaǵy «Boljaý aǵashy» tehnologııasyn qoldana otyryp uıymdastyrylǵan sheberlik synybyna qatysty. «Altyn bala» balabaqshasynda murajaıdy, STEM-kabınetin jáne kitaphanany aralap, sóıleý qabileti buzylǵan balalarǵa arnalǵan toptardaǵy pedagogterdiń jumysymen tanysty. Al «Zerek» bóbekjaı-baqshasynda ınteraktıvti qumsalǵysh, robottehnıka kabıneti, ınteraktıvti alpınızm bólmesi, sensorlyq bólme, STEM-zerthanasynda bolyp, «Intellektým – balabaqsha» iskerlik oıynyna qatysty.
Kókshetaý qalalyq bilim bóliminde jergilikti mektepke deıingi bilim berý uıymdary pedagogteriniń qatysýymen dóńgelek ústel ótkizildi. Oblystyq bilim basqarmasy basshysynyń orynbasary Botagóz Dúısenova kezdesýdiń mańyzyna toqtaldy. «Qarlyǵash» balabaqshasynyń dırektory Beıbitgúl Qazaqpaeva «Jelilik balabaqsha modeli» taqyrybyndaǵy prezentasııasyn usynyp, balabaqshanyń atqaratyn qyzmeti men oqytýdyń ınnovasııalyq ádisterine jan-jaqty toqtalyp, atqarylyp jatqan jumystar týraly taratyp aıtyp berdi.
«Qarlyǵash» balabaqshasynyń №2 obektisiniń meńgerýshisi Raýshan Qojahmetova «Mektepke deıingi uıymdarda bilim berý sapasyn baǵalaý úshin Esegѕ-3 shkalasyn qoldaný» taqyrybynda semınar-trenıng ótkizip, ádistemeni qoldanýdaǵy balabaqshanyń tájirıbesimen bólisti. №1 obektiniń ádiskeri Nurjan Nabatova óz kezeginde «Balabaqshadaǵy Naushop» taqyrybynda semınar ótkizip, mektep jasyna deıingi balalarmen jumys isteýde oqytýdyń ınteraktıvti ádisterin qoldaný barysy týraly aıtyp berdi.
Kezdesý sońynda Kókshetaý qalasynyń mektepke deıingi bilim berý uıymdarynyń pedagogteri is-sharanyń kásibı tájirıbe almasýdaǵy qajettiligine toqtalyp, oı-pikirlerin ortaǵa saldy. Jalpy, Kókshetaý qalasynyń mektepke deıingi uıymdarymen kezdesý barysynda «Qarlyǵash» balabaqshasynyń zamanaýı qyzmetterdi kórsetetin respýblıka boıynsha mektepke deıingi bilim berý mekemeleriniń kóshbasshysy retinde óz tájirıbesin óńirlerdiń mektepke deıingi uıymdaryna taratýǵa daıyn ekendigi atap ótildi. О́ńirlerdiń mektepke deıingi uıymdarymen kezdesýdiń basty maqsaty – «Qarlyǵash» balabaqshasynda qoldanylatyn ınnovasııalyq metodıkalardy tanystyrý, ozyq pedagogıkalyq tájirıbemen bólisý.
«Qarlyǵash» balabaqshasy bıyl osy formattaǵy is-sharalar tizbegin Qazaqstan Prezıdentiniń Is basqarmasy Medısınalyq ortalyǵynyń kúnderi sheńberinde elimizdiń ózge de óńirlerinde ótkizýdi josparlap otyr.
KО́KShETAÝ
