«Biz ony 8 naýryzda SDN tiziminen shyǵardyq. Qazir kórsetkishteri jaqsy, kapıtal jetkiliktiligi – 10 paıyz. Banktiń aksıoneri bolyp sanalatyn «Báıterek» Bereke Bank-ti satý úshin ınvestor izdeý jumystaryn bastady. Bankti qoldaý úshin bıýdjet qarjysy paıdalanylǵan joq. Memlekettik qoldaý da kórsetilmedi. Ázirge bankti satyp alýǵa daıyn áleýetti satyp alýshy joq», dedi Mádına Ábilqasymova.
«Sberbankke» AQSh sanksııasy 2022 jyly 24 aqpanda salyndy jáne bank SWIFT halyqaralyq tólem júıesinen ajyratyldy. Mundaı shekteýler banktiń enshiles uıymdaryna, ıaǵnı Qazaqstandaǵy bankine de áser etti.
Aıta keteıik, 2023 jyldyń 8 naýryzynda AQSh Qarjy mınıstrliginiń Shetel aktıvterin baqylaý jónindegi basqarmasy (OFAC) qarjy ınstıtýtyn Specially Designated Nationals (SDN) sanksııalyq tiziminen jáne sektorlyq sanksııalar tiziminen (SSI) shyǵardy. Sanksııalardy alyp tastaýǵa aksıonerdiń jáne bank ataýynyń ózgerýi yqpal etken. Bank sanksııa tuzaǵyna túskennen keıin oǵan «Báıterek» holdıngi 2022 jyldyń qyrkúıeginen bastap ıelik etken edi.
«Bul – elimizdiń qarjy naryǵynda bolǵan tarıhı sát. Bereke Bank-ti sanksııalyq tizimnen shyǵarý úshin aksıonerdiń, Ulttyq banktiń, retteýshi organnyń tarapynan kóp kúsh jumsaldy. Sondaı-aq IIM jáne AQSh-taǵy Elshilik úlken qoldaý kórsetti. Aıta keterligi, bank barlyq qıyndyqty eńserip qana qoımady, ol óziniń klıentteri men seriktesteriniń aldyndaǵy barlyq mindettemelerin oryndaýdy toqtatpady ári elimizdegi on úzdik ekinshi deńgeıli bank (EDB) qatarynda qaldy. Bul qarjy ınstıtýtynyń qyzmetkerleriniń kásibıligi men senimdiliginiń taǵy bir dáleli boldy», dedi jaǵdaıǵa oraı pikir bildirgen banktiń Basqarma tóraǵasy Andreı Tımchenko.
Resmı habarlamaǵa súıensek, bank sanksııalar kezinde óz qyzmetin toqtatqan joq jáne halyq pen bızneske úzbeı qyzmet kórsetti. Shekteýler kóbinese valıýtalyq operasııalarmen, atap aıtqanda, AQSh dollarynda, eýroda jasalatyn operasııalarmen, sondaı-aq korrespondenttik banktik qatynastarmen jáne sheteldik servıstermen baılanysty bolǵan.
Andreı Tımchenkonyń aıtýynsha, sanksııalardyń alyp tastalýymen baılanysty bankti sapaly damytý jáne nyǵaıtý boıynsha alǵa úlken josparlar qoıyldy.
Búginde Bereke Bank shottardan aqsha sheshý jáne olardy tolyqtyrý operasııalarynyń spektrin, bólshek klıentter, sondaı-aq korporatıvtik bıznestiń barlyq segmentteri úshin qarjy ónimderi men servısterin, taýarlar men qyzmet aqysyn tóleý operasııalaryn, ulttyq jáne shetel valıýtasynda (dollar men eýrony qospaǵanda) jasalatyn aqsha aýdarymdaryn jáne bankomattar arqyly júrgiziletin operasııalardy usynady. Qyzmetter «B-Bank» (jeke tulǵalarǵa) jáne «B-Business» (zańdy tulǵalarǵa) mobıldi qosymshalarynda, sondaı-aq barlyq bólimshelerde qoljetimdi.
