Ǵylymı jurtshylyq kópten kútken úmit aqtaldy, Memleket basshysynyń «Halyq únine qulaq asatyn memleket» tujyrymdamasy jemisin berdi. Árıne, Ulttyq ǵylym akademııasynyń músheleri negizgi maqsat mereıli mártebege qol jetkizýde ǵana emes, sondaı-aq zor jaýapkershiliktiń júkteletinin de jaqsy túsinedi. Buǵan deıin Memleket basshysy ózi tóraǵalyq etetin «Ǵylym jáne jańa tehnologııalar boıynsha» ulttyq keńes qurǵan bolatyn. Aldaǵy ýaqytta sol keńestiń alǵashqy otyrysy ótedi dep kútilip otyr. Sol kezde el ǵylymyn damytýdyń basym baǵyttary aıqyndalyp, Ulttyq ǵylym akademııasynyń jańa mártebege sáıkes atqarar mindetterin aıqyndaý kózdelgen. Ǵalymdar qaýymy usynǵan ǵylymnyń jańa baǵyt-baǵdary baǵamdalyp, iske asyrý tetikteri tııanaqtalady.
Parlament palatalarynyń birlesken otyrysynda jańadan saılanǵan depýtattar aldynda sóılegen sózinde de Qasym-Jomart Kemeluly el ekonomıkasy ǵylymǵa negizdelýi kerektigin erekshe atap ótti. «Ǵylym men bilimdi ekinshi orynǵa qoıǵan memleket eshqashan eshbir salada birinshi orynǵa kóterile almaıdy» degen qaǵıdany qaperine alǵan Memleket basshysynyń: «Qazaqstan ekonomıkasy ǵylymı jetistikterdi negizge alýy kerek. Zertteý júrgizip, patent alý jetkiliksiz. Ǵylymı jańalyqtardy óndiriste paıdalaný qajet. Ǵylymdy jan-jaqty damytý úshin jańa zań qabyldaý kerek» degenin ǵylymı jurtshylyq jyly qabyldady. Sonymen qatar jańa zań jobasyn ázirleýde Ulttyq ǵylym akademııasynyń músheleri de belsendi túrde atsalysýǵa daıyn ekenin aıtqym keledi. Ǵylym áleýetin arttyrýda otandyq ǵalymdar bar kúsh-jigerin aıanbaı jumsaıtynyna senimdimin.
Kárimbek QURMANÁLIEV,
Ulttyq quryltaı múshesi, akademık
