Búginde júkti konteınermen tasymaldaý kólemi sát saıyn artyp keledi. О́tken jyldyń ózinde «Qazaqstan temir joly» ulttyq kompanııasy jelisi boıynsha tasymaldanatyn eksporttyq júkterdiń jalpy kólemindegi konteınerlik tasymaldyń úlesi 4,4 paıyzdy, ıaǵnı 3,5 mln tonna júkti quraǵan.
«Qazaqstan temir joly» UK» AQ-nyń logıstıka jónindegi basqarýshy dırektory Erlan Qoıshybaev: «Konteınerlendirý – temirjol logıstıkasynyń bolashaǵy zor eń perspektıvalysy. Sonymen birge eń kúrdeli aspektisi. Sondaı-aq álemdegi epıdemııalar men geosaıası daǵdarystarǵa qaramastan birqalypty jumys isteı alatyn jyldam ári senimdi kólik túri», degendi shegelep aıtady.
Qoldaǵy málimetterge moıyn bursaq, munaı ónimderi, tyńaıtqyshtar, tústi rýdalar, qurylys júkteri, qara metaldar sııaqty, taǵy basqa da júk túrleri boıynsha eksporttyq tasymaldardaǵy konteınerlik tasymaldaý kóleminiń artyp kele jatqany anyq baıqalady. Mysaly, ótken jyly konteınerdegi eksport kólemi 30 paıyzǵa ósken. Onyń ishinde astyq ónimderi bar 49 myńnan astam JFE shetelderge shyǵarylǵan. Bul kórsetkish burnaǵy jylmen salystyrǵanda 4,2 ese joǵary bolyp otyr. Júk Qytaıdyń Alashańqaı, Úrimshi, Sıan, Chýnsın stansalaryna, sondaı-aq Transkaspıı halyqaralyq kólik baǵdary arqyly Túrkııanyń Mersın porty baǵytyna jóneltilip turdy.
Bularmen birge eksportqa baǵyttalǵan konteınerdegi munaı ónimderi 14,4 ese, untaqtaý ónimderi, ıaǵnı kebek, quramajem, bıdaı uny 6,3 ese artqan. Júktiń basym bóligi Qytaıǵa qaraı jol tartyp jatyr.
Dándi daqyldardan bólek, basqa da kóptegen nomenklatýralar konteınermen jóneltýge jaramdy júkterge jatady. Mysaly, ótken jyldyń qarasha aıynda Ydd Corporation Qaraǵandy ferroqorytpa zaýytynan Túrkııaǵa ferrosılısıı tıelgen pılottyq konteınerlik poıyz jóneltilse, tamyz aıynda Tájikstannyń altyn óndirý salasyndaǵy iri kásiporyndarynyń biri – «Zarafshon» BK JShQ-dan Spıtamen – Dostyq baǵyty boıynsha tústi metaldar keni bar alǵashqy konteınerlik poıyz jolǵa shyqqan.
Oǵan qosa Jitiqara stansasynan Vetnamnyń Ien Ve stansasyna konteıner arqyly «Qostanaı mıneraldary» taý-ken óndirý kompanııasynyń asbest ónimderi jóneltilip júr. Sondaı-aq fleksıtenkterde qazaqstandyq ósimdik maıy Qytaıdyń Shanhaı, Sıan jáne Nantýn qalalaryna turaqty túrde jiberilip keledi. Al tústi metaldardy – konteınerlerde TMTM arqyly Túrkııa men Grýzııa baǵytynda jóneltý uıymdastyrylǵan.
Qazirgi kezde konteınerlik eksporttyq júkterdiń áleýeti shamamen 22 mln tonnany nemese tasymaldanatyn eksporttyq júkterdiń jalpy kóleminiń 28 paıyzyn qurap otyr.
