Ekonomıka men áleýmettik máselelerge basa mán bere otyryp, tez sheshý joldaryn qarastyrý qajet ekenin basa tapsyrdy. Sonymen qatar ǵylym men joǵary bilim, oqý-aǵartý men mádenıet pen sport salalaryn damytýǵa quzyrly organdarǵa arnaıy tapsyrma berdi. Prezıdentimizdiń «Ádiletti Qazaqstan degenimiz – jalań uran emes, bul – anyq aqıqat» degeni kóńilge senim uıalatady. Sonyń bir dáleli retinde «Qazaqstannyń halyq ártisi» ataǵyn qaıtarý týraly sheshiminiń kúshine enip, talaı jylǵy úzilisten keıin ol qazan aıynda alǵash ret laıyqty óner qaıratkerlerine qaıta tapsyrylatyny týraly aıtqany shyǵarmashylyq ókilderin jigerlendirip otyr.
Abaı atyndaǵy qazaq ulttyq opera jáne balet teatrynyń basshysy retinde bul ataqtyń óner adamy úshin qanshalyqty qymbat jáne mańyzdy ekenin jaqsy bilemin. Bar ómirin sahnaǵa arnap, kúndiz-túni izdeniste júretin ártisterdiń eńbegi osyndaı úlken ataqpen Prezıdenttiń óz qolynan marapattalýy – úlken mártebe. Endi bir esten shyǵarmaı muqııat bolatyn másele bar. Ol ataq ekiniń birine berile bermeýi kerek. Qazaqta «áý demeıtin qazaq joq» deıtin sóz bar, el aldynda eshbir asyp bara jatqan eńbegi joq, fonogrammasymen toı men sahnanyń shańyn shyǵaryp júrgen ánshilerge beriletin bolsa, onda ol ataqtyń quny joǵalady. Sondyqtan bul ataq shyn ónerimen eldi aýzyna qaratyp tamsandyrǵan júzden júırik, myńnan tulpar shyqqan, ónerdiń jiligin shaǵyp, maıyn ishken dýaly aýyzdy óner azamattaryna berilip jatsa, halyq syılaıtyn bolady. Áıtpese, keıingi kezde nebir jeke kompanııalar túrli medaldar jasap, toıda medal taratatyn jaǵdaıǵa jettik. Qarap otyryp uıalasyń, medal, orden, maqtaý qaǵazdary tek memlekettik taraptan ǵana tapsyrylýy kerek. Osy máselege tereńinen mán bersek eken.
Baqyt BО́KEBAEV,
Abaı atyndaǵy qazaq ulttyq opera jáne balet teatrynyń dırektory, Qazaqstannyń eńbek sińirgen qaıratkeri
