Shaǵyn jáne orta bıznesti damytý, kásipkerlerge qoldaý bildirý, ásirese nesıelendirý jaǵdaıyn ońtaılandyrý máselelerine aıryqsha nazar aýdaryldy. Shalǵaıdaǵy aýyl turǵyndaryna tıisti ıgiliktiń bári qoljetimdi bolatyny, ol úshin memleket kórsetetin qyzmetter týraly zańdarǵa ózgertýler engiziletinin atap aıtty.
Rasynda, eldiń kúnkóris kózine aınalǵan shaǵyn jáne orta bıznesti damytý kún tártibinde turǵan másele. Osy salany keńeıtý arqyly áleýmettik osal toptaǵy azamattardy qoldap, olardyń óz násibin kásibinen tabýdyń múmkindigi molaıa túseri sózsiz. Jasyratyny joq, elimizde múmkindigi shekteýli jandardyń qatary óspese, kemip otyrǵan joq. Olardyń arasynda memlekettik qoldaýǵa muqtajdary da joq emes. Sondaı-aq sporttyq nysandardy jańǵyrtý jaıy nazardan tys qalmady. Qarap otyrsańyz, barlyǵy da adamnyń jaıly ortada qalypty ómir súrýine jasalǵan nyq qadamdar deýge bolady.
Prezıdenttiń «Aýyl – altyn besigim», «Aýyl amanaty» atty baǵdarlamalardy iske asyrýda memleket tarapynan qarjylaı qoldaý kórsetiletindigi, jer, sý máselesinde de óte mańyzdy jaıttardyń kóterilýi shyn máninde áleýmettiń áleýetin kúıttegen qadamdar dep qabyldadym. Adamı kapıtaldy damytý, kadrlardy daıarlaý, bilim sapasyn arttyrý, mektepterdiń tehnıkalyq bazasyn nyǵaıtý men shekaraly aımaqtardaǵy 65 aýyldyń turmystyq jaǵdaıyn jaqsartý jaıy búgingi kúnniń eń ózekti máseleleri ekendigin ańǵartady. Sonymen qatar «Qazaqstan – 2050» strategııalyq baǵdarlamasyn túbegeıli qaıta qaraý qajettigi de eleń etkizdi.
El amanatyn arqalaǵan májilismender men ár deńgeıli máslıhat depýtattary birlese jumys istegende ǵana «Kúshti Prezıdent – yqpaldy Parlament – esep beretin Úkimet qalyptasady» degen senimmen sózin aıaqtady. Búgingi sessııa jumysy qoǵam aldynda zor mindetter turǵanyn, ony júzege asyrý arqyly halyqtyń áleýmettik-ekonomıkalyq ahýaly áldeqaıda jaqsara túsedi degen úmittemin.
Náılá ÚMBETOVA,
Qurmet ordeniniń ıegeri
Almaty oblysy
