Memleket basshysy jalpaq jurttyń kókeıinde júrgen óte ózekti máselelerge meılinshe kóńil aýdaryp otyrǵandyǵyn birden aıta ketý kerek. Sonyń ishinde azyq-túlik qaýipsizdigi aıryqsha mańyzdy. О́ńirde et jáne et ónimderin óndirý syn kótermeıtini de ras. Onyń birneshe sebebi bar. Mal súmesimen kún kóretin aýyl turǵyndary jaıylym men shabyndyq jerdiń joqtyǵynan qanatyn keńge jaıa almaı otyr.
Sofıevka selolyq okrýginde ornalasqan «Shahman» seriktestigi 2017 jyly quryldy. Áýel basta mal sharýashylyǵymen túbegeıli aınalyssaq dep bel býdyq. Sol kezdegi selolyq okrýg ákimi eger mal qorasyn talapqa saı salatyn bolsańyzdar qajetti jaıylymdyq jáne shabyndyq jer bólinedi dep sendirdi.
Elý bas saýyn sıyr satyp aldyq. Okrýg ákimi talap ketken mal qorasy salyndy. Biraq sodan beri alty jyl ýaqyt ótse de, bizdiń seriktestikke jarty gektar da jer bólingen joq. Biz maldy óz tóli esebinen kóbeıte alar edik. Jalǵyz biz ǵana emes, osy tóńirektegi shaǵyn qojalyqtardyń kórip otyrǵan kúni osy. Tórt túlik maldyń basy ósse, ıgilik te úıiriler edi ǵoı. Shabyndyq jer bolmaǵandyqtan, jyl saıyn mal azyǵyn satyp alamyz. О́tken kúzdiń kúni 15 kelilik shóp býmasy 1200 teńge turdy. Qys ortasynda qymbattady. Dál osyndaı qalyppen bir bas qara maldy qystan aman alyp shyǵý úshin qanshama qarajat qajet. Mine, aýyl sharýashylyǵynyń adymyn alǵa bastyrmaı turǵan eń birinshi másele osy.
Búgingi kúni óńirde paıdalanylmaı jatqan jer qaıtarylyp jatyr degen qýanyshty habardy jıi estımiz. Biraq osy arada ashyqtyq kerek. Ol jerler kimge berilip jatyr, qandaı tártippen, qandaı erejege sáıkes, ol jaǵy beımálim. Jergilikti bılik bul taqyryp tóńireginde aýyz ashar emes.
Osy salanyń azabyn tartyp júrgen adam retinde aıtarym, azyq-túlik qaýipsizdigin qamtamasyz etý úshin eń aldymen aýyldaǵy mal baǵyp otyrǵan qaýymǵa shabyndyq pen jaıylym jetkilikti ári ádil bólinýi kerek. Áıtpese, tirnektep tirshilik etsek degen ynta bar. Jol-jónekeı kezikken osyndaı kedergiler aýyldyń kósegesin kógerter emes. Qazir baıyptap qarap, aqyl tarazysyna salsańyz eshbir qıyndyǵy joq tárizdi. Bos jatqan jer Sofıevka selolyq okrýginde de bar. Jomart jerdiń týsyrap bos jatqanynan góri eldiń ıgiligine jaratylǵany jón emes pe?!
Prezıdenttiń tapsyrmasynan keıin úmit oty tutanǵandaı. Aldaǵy ýaqytta biz tárizdi aýyl sharýasynyń ahýalyn túzeımiz degen adamdarǵa jaǵdaı jasalsa jaqsy bolar edi.
Ádilhan ShAHMANOV,
«Shahman» seriktestiginiń basshysy
Selınograd aýdany,
Aqmola oblysy
