Baqytty balalyqtyń jaınaǵan jazy Alataý aıasynda, Almaty kóshelerinde jalaýyn jelbiretti

Balalardy qorǵaý kúniniń tamasha merekesi áýeli Ortalyq mádenıet jáne demalys saıabaǵynda shat-shadyman balalar sherýimen bastaldy. Kóptegen konsertterdi, festıvalderdi, konkýrstar men jarystardy bir arnaǵa toǵystyrǵan aýqymdy aksııa “Biz seniń balalaryńbyz, Qazaqstan! Biz jańa álemde ómir súremiz” uranyn tý etip, Qazaqstannyń azamattyq Alıansynyń “Birligimiz jarasqan” atty aqparattyq-áleýmettik naýqany aıasynda ótti. Merekege uıytqy bolǵan qala ákimdigi, memlekettik jáne kommersııalyq qurylymdar jas jetkinshekterdiń umytylmas jarqyn saltanatyn bir jeńnen qol, bir jaǵadan bas shyǵarǵan biraýyzdy uıymshyldyqpen ótkizdi. Saıabaqtyń jazǵy alańynda tań sáriden án qanat qaqty. Munda balalar shyǵarmashylyǵynyń “Balǵyn balalyq shaq” dástúrli festıvali ashyldy. Odan soń jıylǵan jas qaýym “Meıirim” festıvaliniń qorytyndy gala-konsertin tamashalady. Jas kórermender aldynda balalar úıleriniń jáne densaýlyǵy kemis balalardy emdeý mekemeleriniń jas jetkinshekterimen birigip respýblıkalyq jáne halyqaralyq konkýrstardyń laýreaty Maqsat Jáýtikov taspaǵa túsirgen festıval gımni alǵash ret oryndaldy. Jeńimpazdardyń gala-konserti Almaty balalar quqyǵyn qorǵaý departamentiniń, Marat Ospanov atyndaǵy qoǵamdyq qordyń jáne “Boztorǵaı” MQ qoǵamdyq qorynyń qoldaýymen ótti. Álbette, bul ıgilikti iske qala ákimi janyndaǵy áıelder isteri jáne otbasylyq-demografııalyq saıasat jónindegi komıssııa da múddelilikpen atsalysty. Jas oryndaýshy daryndar festıval demeýshilerinen gramotalar, dıplomdar, estelik júldeler men syılyqtar aldy. Al uıymdastyrýshylar gımn jazylǵan dıskilerdi syıǵa tartty. Marat Ospanov atyndaǵy qor prezıdenti Baqyt Ospanovanyń aıtýyna qaraǵanda, bıyl bul sharaǵa demeýshiler yqylasy mol bolyp, munyń ózi ınternat mekemelerin jaqsy yntalandyrǵan. Bıylǵy merekeniń bir ereksheligi, ol óziniń jalǵasyn tappaq. Jeńimpaz balalar úshin trenıngter uıymdastyrylatyn bolyp sheshildi. Demek, olardyń ómirden óz oryndaryn tabýyna múmkindik te mol bolmaq. Búldirshinder aldynda memlekettik qýyrshaq teatrynyń ártisteri óner kórsetti. Balalar sýretiniń konkýrsyna qatysýshylar asfalt ústinde ózderiniń Azıada týraly tanym-túsinikterin beıneledi. Sport alańdarynda otbasylyq estafetalar, spartakıadalar jáne mektepke deıingi búldirshinderdiń óner saıystary ótkizildi. Bul kún Alataý aıasyndaǵy baqytty balalyqtyń jarqyn kórinisindeı boldy. Balmuzdaq ta, tátti lımonad ta, qoǵamdyq kólikte júrý de tegin. Balaǵa baqytty bolý úshin qamsyz-muńsyz shýaq kúlkiden artyq ne kerek. Qorǵanbek AMANJOL, “Egemen Qazaqstan”.