Birjan Taldyqorǵan qalasynyń týmasy, ákesi quqyq qorǵaý organdarynda kóp jyl jumys istegen azamat. Búgingi tańda qurmetti eńbek demalysyna shyqty. Sondyqtan «bolashaqta qandaı mamandyq ıesi atanamyn, kim bolamyn?» deıtin suraqtar týyndamaıtyn. Mektepti aıaqtaǵannan keıin Otan aldyndaǵy boryshyn óteý úshin О́skemen qalasyndaǵy Ulttyq ulannyń áskerı bólimine barǵan. Sol jerde azamattyq paryzyn ótegen soń, týǵan jerine oralyp, ákesiniń aq batasymen quqyqtyq tártip áskeriniń 5514 áskerı bólimine qujattaryn tapsyrady.
«Osydan segiz jyl buryn óz mamandyǵymdy tańdaǵanda Otan aldyndaǵy jaýapkershiligimdi sezindim. Munda eshkim tegin kıim, tegin tamaqtaný, ońaı jalaqy úshin kelmeýi kerek. Munda kez kelgen azamat el aldyndaǵy jaýapkershiligin sezinip kelgeni jón. Sonda taǵdyrdyń talaıyna tózip, qıynshylyǵyna tóselesiń. Áskerı qyzmette ońaı bolmaıtynyn bildim. О́z taǵdyrymdy tańdadym. Búginde tańdaýyma ókinbeımin», deıdi ol.
Birjan sarbaz kezindegi starshınasy men vzvod serjantyna aıtar alǵysy mol. Olar bir jyl boıy sarbazdar úshin jaqyndaryn almastyrdy. Olar úshin jaýapkershilikti alyp, qamqorlyǵyn tanytty. Sondaı-aq rota komandıri bolǵan búginde 5514 áskerı bólimi komandıriniń tárbıe jáne áleýmettik-quqyqtyq jumystar jónindegi orynbasary, podpolkovnık Nursultan Tólegenge de aıtar alǵysy zor.
«Áskerı bólim komandıriniń orynbasary bolyp podpolkovnık Nursultan Tólegen kelgende ishteı qýanǵanymdy jasyrmaımyn. Ol ofıser meniń rota komandırim boldy. Bir jyl boıy onyń qolastynda qyzmet atqardym. Meni de birden tanydy. Búginde áskerı bólimdegi oń ózgerister de bólimniń bas tárbıeshisine baılanysty. Sonymen qatar ózimniń starshınam men vzvod serjanty, bólimshe komandırlerine aıtar alǵysym kóp. Olar meni jaýynger etip tárbıeledi. Men de alǵan bilimim men tájirıbemdi qyzmetimde qoldanyp kelemin. Jaýyngerlik daıyndyqtyń joǵary bolýyna úlesimdi qosamyn. Sarbazdardyń shıraq bolýyna, shymyr bolýyna men bir adamdaı úles qosyp jatqanyma ishteı rızamyn», dep aǵynan jaryldy aǵa serjant B.Nurymǵalıev.
Birjan Erlanuly – isine myǵym, sózine saq azamat. Ár sózi qorǵasyndaı salmaqty. Ákesinen beri jalǵasyp kele jatqan tálimi men óziniń týa bitken jaýapkershiligi ony toptyń ishinen alyp shyǵyp, úzdikterdiń qataryna qosty. Ol týraly joǵaryda sózge qosqan 5514 áskerı bólimi komandıriniń tárbıe jáne áleýmettik-quqyqtyq jumystar jónindegi orynbasary, podpolkovnık Nursultan Tólegen: «Úzdik serjant bolý úshin aldymen tárbıeli azamat bolǵan jón. Sonymen qosa, áskerı qyzmet atqarý barysynda da bolashaq áskerı maman bilinedi. Birjan Erlanulyn sarbaz kezinen bilemin. Sol kezdiń ózinde sertke berik sarbaz bolatyn. Búginde ómirin Ulttyq ulanmen baılanystyryp, 5514 áskerı bólimine kelgenin qup kórdim. Bizdiń ortamyzda úzdikter kóp bolsa, qyzmetimizdiń barlyq salasy alǵa basady», dedi.
Elimiz qashan bolsyn erlerge senim artatyny belgili. Tek áskerı antyna berik Birjan sekildi azamattar jeke quramdy erlikke bastap, elge qorǵan bola bilmek.
Daryn SEIITOV,
áskerı jýrnalıst
