«Osy aptada qaraqumyq jarmasynyń baǵasy – 1,3 paıyzǵa, qant – 0,8 paıyzǵa, pııaz – 0,3 paıyzǵa jáne kartop – 0,7 paıyzǵa tómendedi. Sondaı-aq jalpy úsh óńirde, ıaǵnı Almaty qalasy, Shyǵys Qazaqstan, Almaty oblystarynda kúnbaǵys maıynyń baǵasy 1,1 paıyzǵa tómendedi», dep atap ótti Saýda komıteti tóraǵasynyń mindetin atqarýshy Aıdar Ábildabekov.
Sonymen qatar Maıly daqyldardy qaıta óńdeýshiler qaýymdastyǵynyń málimetteri boıynsha 2022 jyldyń qazan-qarasha aılarymen salystyrǵanda kúnbaǵys kúnjarasynyń baǵasy 30%-ǵa, al kúnbaǵys maıynyń baǵasy ótken jyldyń qarashasymen salystyrǵanda 19%-ǵa deıin tómendegen. Qazir otandyq maı zaýyttarynda óndiriletin tazartylǵan kúnbaǵys maıynyń satý baǵasy lıtrine 630-680 teńge aralyǵynda.
Aýyl sharýashylyǵy vıse-mınıstri Ábilqaıyr Tamabek óńirlerdegi qalyptasqan qorlardan kókónisterdi brondaýdan shyǵarý nátıjeleri men qorlardyń kólemi jaıly málimdedi. Sáýir aıynyń sońyna deıin 29,9 myń tonna kartopqa qajettilik týsa, 18 óńirde bul kókónis túrimen qamtamasyz etý kólemi 90 paıyzdan joǵary, qalǵan eki óńirde – 69 paıyzdy qurady. Sábizge suranys bıylǵy sáýir aıynyń sońyna deıin – 6,8 myń tonna bolsa, Qaraǵandy oblysyn (69 paıyz qospaǵanda, qormen qamtamasyz etý 100 paıyzdan joǵary. Eki oblys (Jambyl jáne Qyzylorda) qyryqqabatpen 50 paıyzdan tómen, al qalǵan barlyq óńir odan joǵary deńgeıde qamtamasyz etildi. Barlyq oblystardaǵy pııaz qory 50 paıyzdan asady.
«Biz taýarlyq ıntervensııalar jumysynyń nátıjesin kórip otyrmyz jáne bul jumysty erte shyǵatyn kókónis túrleri kelip túskenshe jalǵastyrýymyz kerek. Sonymen qatar azyq-túlik taýarlaryn forvardtyq satyp alýdy qarjylandyrýdy 70%-ǵa deıin ulǵaıta otyryp, áleýmettik mańyzy bar azyq-túlik taýarlarynyń baǵasyn turaqtandyrý tetikterin iske asyrýdyń úlgilik qaǵıdalaryn qaıta qarap, aınalym shemalary boıynsha 30%-ǵa deıin tómendetý qajet. Osylaısha, forvardtyq satyp alýlardyń arqasynda bizde naryqtaǵy baǵanyń turaqtanýyna áser etýge múmkindik beretin ónim qorynyń kepildendirilgen kólemi bolady», dedi Serik Jumanǵarın.
