Akademııa rektory Erlan Ábildiń aıtýynsha, memlekettik qyzmetshilerdi daıarlaýǵa Úkimetten magıstratýra baǵdarlamasyna – 120, doktorantýraǵa 12 grant bólingen.
«2023 jyly oqýǵa qabyldaý 6 magıstratýra baǵdarlamasy, kúndizgi oqý bóliminde 3 doktorantýra baǵdarlamasy boıynsha jáne óndiristen qol úzbeı oqytylatyn 2 modýldik baǵdarlama boıynsha júrgiziledi. Sondaı-aq akademııada aqyly túrde kúndizgi bólimde jáne modýldik formatta bilim alýǵa múmkindik bar», dedi oqý ornynyń rektory.
Konkýrstyq irikteýdiń alǵashqy kezeńi onlaın, suhbattasý kezeńi betpe-bet júzdesý formatynda ótedi. Qujat tapsyrý https://admission.apa.kz portalynda júrgiziledi. Bıylǵy qabyldaý kezeńinde birqatar ózgeris bar.
«Halyqaralyq qatynastar» baǵdarlamasy boıynsha oqý merzimi 1 jyldan 2 jylǵa deıin uzartyldy. Doktorantýra baǵdarlamalary úshin jumys ótili boıynsha talap 3 jyldan 5 jylǵa deıin ulǵaıtyldy. Eger ótken jyly basshy qol qoıǵan joldama aldyn ala oqýǵa túsý kezinde, ıaǵnı konkýrstyq irikteýden keıin tapsyrýǵa múmkindik berilse, bıyl úmitkerler júıege qol qoıylǵan joldamany 29 maýsymdy qosa eseptegende qujat qabyldaý aıaqtalǵansha tirkeýi kerek. Taǵy bir aıta keterlik jaıt, bıyldan bastap modýldik oqytý qaǵıdaty boıynsha magıstratýra memlekettik qyzmetshi emes tulǵalarǵa, ıaǵnı kvazımemlekettik jáne jeke sektor ókilderine ǵana arnalady», dedi Erlan Ábil.
Sonymen qatar akademııany memlekettik tapsyrys boıynsha B+ (GPA 3,33) kórsetkishpen aıaqtaǵandar, oqýdy bitirgennen keıin bir jyl ishinde jergilikti atqarýshy organdarda, máslıhattar apparattarynda, revızııalyq komıssııalarda, ortalyq memlekettik organdardyń jáne olardyń vedomstvolarynyń aýmaqtyq bólimshelerinde (Astana qalasy men onyń aýdandaryndaǵy jergilikti atqarýshy organdardan, máslıhat apparatynan, revızııalyq komıssııalardan, ortalyq memlekettik organdar men olardyń vedomstvolarynyń aýmaqtyq bólimshelerinen basqa) «B» korpýsynyń memlekettik ákimshilik laýazymdaryna Memlekettik qyzmet isteri agenttigimen jáne onyń aýmaqtyq bólimshelerimen kelisý boıynsha konkýrs ótkizilmesten qyzmetke ornalasa alady.
Taǵy bir ózgeris, akademııa túlegi-memlekettik qyzmetshiniń ony oqýǵa jibergen memlekettik organda jumyspen óteý jónindegi mindeti alynyp tastaldy. Endi memlekettik qyzmetshige akademııada oqýyn aıaqtaǵannan keıin memlekettik qyzmette 3 jyl jumys isteý jetkilikti.
Sondaı-aq «Bilim týraly» zańǵa sáıkes joǵary oqý oryndarynda joǵary oqý ornynan keıingi bilim berý baǵdarlamalary boıynsha memlekettik bilim berý tapsyrysy negizinde buryn bilim alǵan memlekettik qyzmetshiler memlekettik bilim berý tapsyrysy boıynsha akademııaǵa magıstratýraǵa nemese doktorantýraǵa qaıta oqýǵa túse alady.
