Aqpanda taraǵan indettiń beti áli kúnge deıin qaıta qoıǵan joq. Aýrý belgileri baıqala sala aýdandaǵy veterınarlyq pýnkt meńgerýshileri E.Kitapbaev pen M.Qurmanov qan synamalary men bıologııalyq materıaldardy alyp, «Respýblıkalyq veterınarııalyq zerthana» ShJQ RMK fılıalyna joldaǵan. Saraptama aktilerine sáıkes joǵaryda atalǵan úsh aýyldyq okrýg turǵyndaryna tıesili usaq múıizdi maldyń qan sarysýy vırýsologııalyq zertteýleri oń nátıje berdi. Sóıtip, usaq múıizdi maldan sheshek aýrýy shyǵýyna baılanysty 13 naýryzdan Aqqaınar jáne Katonqaraǵaı aýyldyq okrýgteri ákimderiniń sheshimderimen Shyńǵystaı, Jańaúlgi jáne Aqqaınar aýyldarynyń aýmaǵyna karantın rejimi engizilgen. Qazirgi ýaqytta úsh aýyldyń kireberisine blok-beketter qoıylyp, kirgen-shyqqan kólikter tekseristen ótedi. Iаǵnı aýyldan qoı-eshki alyp shyǵýǵa nemese kirgizýge bolmaıdy.
– Aýylǵa kirgen, shyqqan ár kólikti tekseremiz. Tekserip qana qoımaımyz, kólikter dezınfeksııalanyp bir-aq kiredi. Ol úshin shlagbaýmnyń aldynda arnaıy suıyqtyq quıylǵan tósenish bar, – deıdi blok-beket kezekshisi Ermek Satyshev.
Iá, qorǵanys jan-jaqty qarastyrylǵan. Kún-túni kezekshilik júrgizilip turady. Alaıda aýrýdyń aldyn alý sekildi sharalardyń júrgizilmeıtini aıdan anyq. Ony aıtyp otyrǵanymyz, veterınarııa máselesin az qaýzaǵanymyz joq. Bir emes, birneshe ret problema kóterdik. Atap aıtsaq, veterınarııa salasynyń materıaldyq bazasy jupyny, jalaqysy mardymsyz, mamandar joq. Tıisti jaǵdaı jasalmaǵan soń da aýrý shyǵady.
Oblystyq veterınarııa basqarmasynyń basshysy Ramıl Saǵyndyqovtyń aıtýynsha, qazirgi ýaqytta usaq múıizdi mal arasynda ólim men jańadan aýyrǵandar baıqalmaıdy. Katonqaraǵaı aýdanyndaǵy epızootııalyq jaǵdaı – veterınarlyq qyzmettiń baqylaýynda. 11 maman, 6 tehnıka, 8 myńnan asa malǵa vaksına egildi.
Shyǵys Qazaqstan oblysy,
Katonqaraǵaı aýdany
