Nurmaǵambetovtyń aıtýynsha, Astanada 6 adamnan turatyn uıymdasqan toptyń qylmystyq qyzmeti áshkerelendi, ol jyl boıy jezókshelikpen jáne jeńgetaılyqpen aınalysý úshin prıton ustaýmen aınalysqan. Júıeli túrde qylmystyq jolmen tabys tabý úshin kúdiktiler astananyń elıtaly turǵyn úı keshenderiniń birinen 3 páter jaldap, onda prıton uıymdastyrǵan.
«Qylmyskerler óz qyzmetin asa qupııa ustaý úshin turǵyn úı kesheniniń kúzetshilerimen baılanys ornatyp, polısııa reıdteri týraly eskertý jasaý jaıynda kelisim jasasqan. Reıd júrip jatqanda olar dereý jaldamaly páterlerden ketip qalyp otyrǵan», dedi Nurmaǵambetov.
Uıymdastyrýshylar krımınaldyq bıznesten kún saıyn orta eseppen 1 mıllıon teńgege deıin alyp otyrǵan. Polısııa qyzmetkerleri ıntımdik qyzmet kórsetetin 11 adamdy anyqtaǵan. Tintý barysynda 20 myń AQSh dollary, 156 myń Reseı rýbli jáne 720 eýro somasynda aqshalaı qarajat tárkilengen.
«Osy fakt boıynsha uıymdasqan top qurý jáne oǵan basshylyq etý, prıton ustaý jáne jeńgetaılyq baptary boıynsha sotqa deıingi tergeý bastaldy. Kúdiktiler ustaldy, ekeýi qamaýda, qalǵandary qolhatpen bosatyldy», dedi IIM ókili.
