Sazdy keshte túrli dıagnozdary bar balalar Maıra Ilııasova, Svetlana Aıtbaeva, Gúlnur Orazymbetova, Araılym Rahymqyzy, Ákimhan Májenov, Aqbota Qusnadın jáne Qazaq ulttyq horeografııa akademııasynyń oqýshylarymen birge óner kórsetti. Aıta keteıik, «Astana Opera» qaıyrymdylyq is-sharasymen on jyldan beri aınalysyp keledi.
– Mundaı is-sharalardy ótkizý tájirıbemizde burynnan bolǵannan keıin, balalardyń jaǵdaıyna mýzykanyń oń yqpal etetinin baıqaımyz. Bári sahnaǵa shyǵatyndaryna máz-meıram kúıde bolady. Al olardyń ata-analary budan da zor sezimdi bastan keshiredi, olardyń kózderi qýanyshtan jaınaıdy. Mundaı sátterde osy balalardy búkil álem qamqorlyq pen iltıpatqa bólese eken deısiń, – deıdi «Astana Opera» teatry dırektorynyń orynbasary Aıjan Qurmanǵalıeva.
Atalǵan konsert aýtızmi bar balalardyń án aıtyp, bıleıtinin jáne mýzykalyq aspaptarda oınaı alatynyn kórermenge pash etýdi maqsat etken. Sondaı-aq eń mańyzdysy – shyǵarmashylyqpen aınalysý balalarǵa qoǵammen bite qaınasýǵa kómektesedi.
Kesh baǵdarlamasy otandyq jáne shetel kompozıtorlarynyń mýzykasynan quryldy. Onyń ishinde Volfgang Amadeı Mosart, Iogann Sebastıan Bah, Sharl Gýno, Tólegen Muhamedjanov, Eskendir Hasanǵalıev, taǵy basqalardyń shyǵarmalary bar. Osynshalyq kúrdeli baǵdarlamany oryndaý erekshe balalar úshin joǵary kórsetkish sanalady.
Sahnaǵa shyqqan Daryn Ájmoldaev, Jiger Ahmetqalı, Nurym Narymbaı, Erbol Zákárııa, Erasyl Zákárııanov, Ádil Kenjebaı, Amın Bıjan, Ulan Úsenálıev, Gúldana Akımova, Danııal Jýasov, Rahmatýlla Dildahan, Ernur Turmahanbetov óz múmkindikterin barynsha kórsetti.
Sondaı-aq qaıyrymdylyq is-sharasy barysynda kórme uıymdastyryldy. Onda túrli kúrdeli dıagnozy bar balalar salǵan sýretter men qolóner buıymdary usynyldy. Balalarǵa kórmege belsendi qatysqany úshin alǵys hattar tabys etildi.
