Jer ábden qaraımaıynsha, arqany keńge salýǵa erterek. Sondyqtan da jergilikti atqarýshy bılik qaýip tóndirgen aımaqtardy baqylaýda ustap otyr. Buǵan deıin málim bolǵanyndaı, óńirde qyzyl sý júrýi múmkin degen 146 eldi meken bar. Biraq búgingi tańǵa deıin olardyń eshqaısynan jamanat habar túspedi.
Oblys ákimi Ermaǵanbet Bólekpaev tótenshe jaǵdaılar departamentiniń bastyǵy Murat Qatpanovpen sý tasýy múmkin ýchaskelerdi jaqynda arnaıy aralap kórip, qadaǵalaýdy odan ári kúsheıtti. Ol ýchaskeler – Nura jáne Sherýbaı-Nura ózenderiniń arnasyndaǵy aýmaq. Atap aıtqanda, Qarqaraly, Buqar jyraý, Shet jáne Abaı aýdandarynyń qaýipti ýchaskeleri baqylaýda. Sonymen qatar eldi mekender mańyndaǵy gıdrotehnıkalyq qurylymdar da qatań qadaǵalaýda. Sý arnasynan asqan tusta septigi tıer topyraq úıindileri men bógetter de nazardan tys qalmady.
Murat Qatpanovtyń aıtýynsha, qardyń kúrt erip, ábigerge salǵany ázirge baıqalmaıdy.
– Aqtoǵaı jáne Shet aýdandarynyń soltústik aýmaqtary, Buqar jyraý aýdanynyń ońtústik-batys bóligi, Osakarov aýdanynyń batys bóligi jáne Nura ózeniniń arnasy boıynsha Nura aýdanynyń soltústik-shyǵysynyń az bóligi áli de qar astynda.
Qardyń jyldam erýine naýryzdyń basyndaǵy jyly kúnder, jaýyn-shashyn, kúzgi jaýyn-shashynnyń ádettegi qalyptan tómen túskendigi de áser etti. О́zenderdiń arnasynan asýy men sý mólsheriniń artýy tirkelgen joq, – dedi Murat Qatpanov.
О́zenderde muzdy usaqtaý, burǵylaý jáne kesý únemi júrgizilip keldi. Bul oraıda Buqar jyraý, Osakarov, Qarqaraly jáne Aqtoǵaı aýdandarynda jalpy aýdany 7000 sharshy metr bolatyn 17 ýchaske qamtyldy.
4845 sý ótkizý qubyr, 187 shaqyrym kanal men aryq, 463 kópir qardan arshyldy. 143 shaqyrym sý ótetin transheıa jasaldy. Qazirgi ýaqytta da sý tasqynyna qarsy jumystar saıabyrsyǵan joq.
QARAǴANDY
