Úsh balany bosanǵan ana birden kópbalaly januıa qataryna qosyldy. Ásel Shontaeva otbasymen byltyr tamyz aıynda Jambyl oblysy Qordaı aýdanynan elordaǵa kóship kelgen. Úshemniń ekeýi – qyz, bireýi – ul. Qala turǵyny №3 kópbeıindi qalalyq aýrýhana dárigerlerine alǵysyn bildirdi.
Qýanysh ıesin arnaıy quttyqtaý úshin Astana qalasynyń Qoǵamdyq densaýlyq saqtaý basqarmasynyń basshysy Tımýr Muratov bardy.
«Bala densaýlyǵy basty nazarda, ári elordamyzda jyl saıyn turǵyndar sany, onyń ishinde balalar qatary artyp kele jatqandyqtan, taǵy da eki perınataldyq ortalyq salý josparda turǵanyn aıtqym keledi. Qazir úsh birdeı perzenthana jumys istep tur. Budan bólek kadrlardyń kásibıligin arttyrýǵa erekshe kóńil bóletinimiz barshańyzǵa málim. Byltyr 800-den astam maman jergilikti bıýdjet qarajatynan shetelde bilim alyp keldi. Olardyń arasynda neonatolog, pedıatr mamandary jeterlik», dedi basqarma basshysy.
Jyl saıyn atalǵan aýrýhanada 8 myńnan astam áıel medısınalyq kómek alady. Bıyl Astanada 7 myńnan astam sábı dúnıe esigin ashqan. Táýligine akýsherler 15-25 júkti anany qabyldaıdy. Elordada jylyna 33 myńnan astam sábı dúnıege kelse, onyń ishinde eko kúshinsiz úshem ómirge kelýi sırek jaǵdaı.
«Byltyr ana ólimi bolǵan joq, náreste shetinep ketken jaǵdaı eń tómen deıgeıde boldy. Pasıentterimizge kórsetiletin qyzmet sapasy únemi baqylaýda», deıdi bas dáriger Juldyz Danbaeva.
Sánııa, Samıra jáne Aısultan esimdi balapandardyń densaýlyǵy qazir jaqsy. Dárigerler sábılerge kútim kórsetip, úıine shyǵýy úshin daıyndap jatyr.
