Halyqaralyq Farabı forýmy adamzattyń uly oıshyly – ál-Farabıdiń murasyn tereń zertteýge, keńinen taratyp, nasıhattaýǵa arnalǵan iri ǵylymı is-shara. Sharanyń maqsaty – oıshyl ǵalymnyń baı murasyn jańa qyrynan zertteý, Farabı murasy arqyly qazirgi qoǵam damýynyń rýhanı, tarıhı jáne fılosofııalyq negizderin túsiný, qazaqstandyq jáne sheteldik farabıtanýshylardy biriktirý, jańa zertteýlerdi saralaý.
Forým jumysyn quttyqtaý sózben ashqan ál-Farabı atyndaǵy QazUÝ-dyń Basqarma Tóraǵasy-Rektory Janseıit Túımebaev: «Búgingi halyqaralyq Forým ál-Farabı qubylysyn zamanaýı taldaýdy jáne tereń zertteýdi talap etedi. Bizdiń aldymyzda ál-Farabı týraly barlyq aqparatty biriktirý mindeti tur. Forýmnyń tarıhı mıssııasy – Farabı ilimi arqyly jastardyń oı-órisin keńeıtý, tarıhı jáne zamanaýı qundylyqtardy toǵystyrý arqyly farabıtanýdaǵy jańa baǵyttardy damytý», dep atap ótti.
Forýmda sóılegen sózinde Iran Islam Respýblıkasynyń Almatydaǵy Bas konsýly Mýhsın Faǵanı barlyq qatysýshylardy Farabı ortalyǵynyń 30 jyldyq mereıtoıymen quttyqtady. Onyń pikirinshe, Farabı – óz zamanynyń danyshpany, ózinen keıingi oıshyldardyń oı órisine tereń de eleýli áser qaldyryp, ıslam órkenıetiniń gúldenýine negiz bola bilgen ǵulama ǵalym. Sondyqtan kópshilik ony eń uly musylman fılosofy jáne ıslam fılosofııasynyń negizin qalaýshy dep ataıdy.
Forýmnyń ashylý saltanatynda Nur-Múbarak Egıpet ıslam mádenıeti ýnıversıtetiniń rektory Muhammed ash-Shahhat Ál-Djındı (Egıpet), Almaty qalasyndaǵy О́zbekstannyń Bas konsýly – Abror Fathýllaev (О́zbekstan), jáne t. b. sóz sóıledi.
Islam Konferensııasy (COMSTECH) uıymynyń ǵylym jáne tehnologııalyq operasııalar komıtetiniń bas úılestirýshisi Chaýdharı Muhammed Ikbal, túrki halyqtary fılosofııalyq qoǵamynyń teń tóraǵalary: fılosofııa ǵylymdarynyń doktory, ál-Farabı atyndaǵy QazUÝ professory Tursyn Ǵabıtov jáne fılosofııa ǵylymdarynyń doktory, professor, Hadjettepe Ozkýl Chobanoglý ýnıversıtetiniń (Túrkııa) túrik halyqtyq bilim berý kafedrasynyń meńgerýshisi jáne t. b. forýmǵa óz quttyqtaýlaryn joldady.
Forým jumysyna Ǵylym jáne joǵary bilim, Aqparat jáne qoǵamdyq damý, Mádenıet jáne sport, Syrtqy ister mınıstrlikteriniń ókilderi, QR UǴA músheleri, Qazaqstandaǵy sheteldik konsýldar, sheteldegi ál-Farabı ortalyqtarynyń ókilderi, ǵalymdar men dıplomattar, Túrkııa, Nıderlandy, Reseı, О́zbekstannan kelgen jas ǵalymdar qatysty.
Forýmǵa qatysýshylar ǵylym men bilim berýdiń ıntegrasııasyna, qazirgi qoǵamnyń rýhanı-adamgershilik jáne zııatkerlik mádenıetin jetildirýge qatysty ózekti máselelerdiń keń aýqymyn talqylady.
Forým aıasynda «Ábý Nasyr ál-Farabıdiń murasy jáne álemdegi psıhologııalyq ǵylymdy damytý», «Ál-Farabıdi tárbıeleý tili: mádenıetaralyq qarym-qatynas jáne ulttyq bolmys kontekstindegi tulǵa» jáne t. b. pikirtalas alańdary uıymdastyrylyp, arnaıy semınarlar ótip jatyr.
