Ol kishkentaı kezinen ata-ájesiniń tárbıesin kórip, tórt túlikke jaqyn bolyp ósken. Ájesine mal jaıǵaýǵa kómektesip júrip, ásirese jylqyǵa qyzyǵýshylyǵy oıanǵan.
«Jylqynyń adamdy tartyp turatyn qasıeti bar. О́zimniń jeke tulparym bolǵanyn qalaýshy edim. Bul qalaýyma áke-sheshem qoldaý bildirip, ózim jınaǵan aqshaǵa taı satyp aldym. Sol taıdy ózim qolǵa úıretip, jem-shóbin, sýyn berdim. Alǵash ret taıǵa mingen sátim umytylmaıdy», deıdi Darııa Bolatqyzy.
Oqýshynyń aıtýynsha, attan birneshe ret qulap, gıpspen júrýine týra kelgen. Muny kórgen áke-sheshesi atqa minýine tyıym salypty. Keıin qyzynyń yntasyn baıqap, ruqsatyn bergen eken.
«Ár ata-ana balasynyń amandyǵyn oılaıdy. Balasynyń eshteńege urynbaı, aman oralǵansha alańdap júredi. Attan qulaǵanymdy kórgen áke-sheshemniń qobaljýy, alańdaýy oryndy. Biraq meni eshkim atqa minýge májbúrlegen joq. Atqa miný – ózimniń qalaýym», deıdi ol.
Darııanyń otbasynda ápkesi men sińlisi, inisi bar. Ákesi Bolat Berekenovtiń mamandyǵy – mehanık. Al anasy Aısulý Jumǵalıeva mektepte eńbek páninen dáris beredi.
«Atqa minýdiń paıdasy óte kóp. Birinshiden, kóńil kúıiń kóterilip, sergek júresiń. Ekinshiden, bul – bizdiń halqymyzdyń ǵasyrlar boıy qalyptasqan mádenıetimiz. Burynǵy babalarymyz atqa minip, baıtaq jerimizdi qorǵap qalǵanyn tarıhtan bilemiz. «Jaýjúrek myń bala» kınosyn kórgennen soń atqa degen qyzyǵýshylyǵym arta tústi. Maǵan sol kınodaǵy Qorlannyń obrazy unady. Men de osyndaı ulttyq kınoǵa túsýdi armandap júrmin», deıdi asaý úıretken oqýshy qyz.
Báıge, qyz qýý, jamby atý sekildi ulttyq sport túrlerin meńgergen. Byltyr Mahambet aýdanynda Konstıtýsııa kúnine oraı ulttyq oıyndar báıgesine qatysty. At sportyna den qoıýmen shektelmeı, ózi baptaǵan tulparyn báıgege qosyp júr. Báıgege qosqan tulpary 20 júıriktiń arasynan 2-oryndy ıelengen.
«Halqymyzdyń ulttyq oıynynyń biri – qyz qýý. Bul oıynǵa Nurshat Álıhan, Fatıma Orynǵalı, Qymbat Asylhan, Sáýle Asankeldi sekildi qurbylarymmen birge alǵash ret qatysqan edim. Maǵan qyz qýýdyń sharty unady. Erejege sáıkes jigit qyzdy qýyp jetip, belbeýinen sharfty julyp alýy kerek. Sol oıynda bizdiń jolymyz boldy. Biz mingen tulparlarǵa jigitter jete alǵan joq. Ulttyq at sport túrlerine qatysqanyma eki jol boldy. Ul bolsam, aýdaryspaq pen teńge ilýdi, kókpardy da meńgerip alar edim. Sporttyń qıyn túri joq. Eń bastysy, kez kelgen sport túrin erkin meńgerip, jetistikke jetý úshin ynta qajet», deıdi D.Bolatqyzy.
Onymen birge atqa minýdi, at ústinen sadaq atýdy úırenip júrgen qyzdar bar. О́ziniń sińlisi de atqa qumar. Oqýshy qyz kúnine 4-5 saǵatyn tulparyn baptaýǵa arnaıdy. Jem-shóbin, sýyn jańartyp, serýenge alyp shyǵady.
«Bizdiń aýylda atqa minýdi serik etken 10-ǵa jýyq er bala bar. Sol uldarmen birge men de atqa minýdi úırenshikti ádetime aınaldyrdym. Tulparymnyń qasynda júrsem, ýaqyttyń qalaı tez ótkenin ańǵarmaı qalamyn. Bolashaqta ulttyq at sportynyń órkendegenin qalaımyn. Sol sebepten, oǵan ózimniń úlesimdi qosqym keledi. Osy maqsatymdy iske asyrý úshin Almatydaǵy qazaq qyzdar pedagogıkalyq ýnıversıtetine oqýǵa túsýge daıyndalyp júrmin. Joǵary bilim alyp, ulttyq sportty damytýǵa qyzmet etetin bilikti maman bolǵym keledi», dep aldaǵy maqsatymen bólisti asaý úıretken arý.
Atyraý oblysy
