Egemendikke qol jetip, Táýelsizdik týyn kótergeli shashylǵanymyzdy jınap, umyt qaldyrǵanymyzdy jańǵyrta bastadyq. Kúlli qazaqtyń qasıetti tóri –Túrkistanymyzdyń ımanymyzdyń kórki, dinimizdiń tóri, rýhanı astanamyz ekenin de endi bilip jatyrmyz.
Bıyl Túrkistan oblysy qurylǵaly 5 jyl toldy. Osy dataǵa oraı aýdan ákimi Dildabek Orazbaevtyń qoldaýymen Tassaı aýyldyq okrýginiń ónerpazdary Túrkistan qalasynda óz ónerlerin kórsetip qaıtty. Osy saparǵa aýdanymyzdyń beldi azamattary demeýshilik kórsetti. Sonymen qatar aýdandyq bilim bólimi basshysy Aslan Tanyspaev pen Muhtar Áýezov atyndaǵy mekteptiń dırektory Gúlmıra Muhametqalıeva rýhanı kerýen quramyndaǵy oqýshylar men muǵalimderdiń alańsyz baryp kelýine jaǵdaı jasady.
«Túrkistan er túriktiń besigi ǵoı» atty konsertti Tassaı aýyldyq okrýgi mádenıet úıiniń meńgerýshisi Qabdykárim Baıjumanov, besaspap asaba Berik Báıgereev, tárbıelik qasıetti boıyna sińirgen ulaǵatty ustaz Baqyt Mazybaeva ashyp berdi. Jerlesimiz Farhat Maratuly óziniń arnaýynda Túrkistan men Abaı oblysynyń tarhyn tereńnen baılanystyra tolǵasa, Manarbek Bekishev, Qatren Baıjumanov, Meıirli Sydyqovanyń oryndaýlaryndaǵy Abaı óleńderi kórermenderdi uly babamyzdyń máńgi jasaıtyn ǵıbratty joldarymen sýsyndatty.
Baǵdarlama barysynda Tassaı aýyldyq okrýginiń ákimi Erjan Mázibaev qysqasha sóz sóıledi. Ol Kókpekti aýdany ákiminiń atynan is-sharaǵa atsalysqan kitaphana dırektory men ujymyna alǵysyn bildirip, syı-sııapat jasady. Jergilikti halyq Abaı oblysynan kelgen tassaılyqtarǵa ystyq yqylas, jaqsy peıil tanytyp, mundaı taǵylymdy is-sharalar aldaǵy ýaqytta da óz jalǵasyn tabatynyna senim bildirdi. Al tassaılyq jurttyń sálemin jetkizgen shaǵyn ǵana aýyldyń rýhanı kerýeni saparyn qasıetti jerlerge zııarat etýmen aıaqtady.
Qaırat MÁLIKAJDAR
TÚRKISTAN
Ustazym – úlken jolǵa bastaýshym
«Ustazy jaqsynyń ustamy jaqsy» deıdi halyq. Búginde alǵa umtylyp, bilimimizdi paıdamyzǵa jarata alýymyz tek sol kisilerdiń arqasy. Dúnıede adam balasynyń eki anasy bolady eken. Biri ómirge ákelgen bolsa, ekinshisi bilim úıretip, qabiletin ashqan adam. Qolyńa qalam ustatyp, árip tanytyp, jazýdy úıretken alǵashqy muǵalimiń esińde erekshe qalady eken. Sol sekildi, meniń de ómirimde ustazdyqtyń uly tańbasyn qaldyrǵan jan bar. Ol – Gúlmıra Dúısenqyzy.
2006 jyly Amangeldi aýdanyndaǵy Jańa aýyl jalpy bilim beretin orta mektebine bastaýysh synyp muǵalimi bolyp jumysqa ornalasqan Gúlmıra Dúısenqyzynyń aldyna 2010 jyly shákirt bolyp bardym. Ol tórt jyl ishinde tek bilim berip qana qoımaı, jetistikke jetýime de, aldyma naqty maqsat qoıýyma da sebepshi boldy. Ádebıet álemine qyzyǵýshylyǵymdy erte oıatqandyqtan, mamandyǵymdy nebári 2-synyp oqyp júrgenimde tańdaǵanmyn. Búginde jýrnalıstıka baspaldaǵyna erkin aıaq basýym ustazdar artqan úmittiń arqasy dep bilemin.
«Adamnyń adamshylyǵy – jaqsy ustazdan», deıdi Abaı. Jıyrma jyldan astam eńbek ótilinde Gúlmıra apaıdyń tárbıelegen shákirtteri elimizdiń bedeldi ýnıversıtterinde oqydy. Olardyń arasynda pedagog pen dárigerden bastap, sarapshy, áskerı qyzmetker, ınspektor, jýrnalıst jáne teatr ártisterine deıin bar. Qazir joǵary bilim alyp júrgenderi de kóptep sanalady. Al el ıgiligi úshin qyzmet etetin túlekteriniń bolýy ustaz úshin qandaı baqyt deseńizshi.
Gúlmıra Dúısenqyzynyń eńbegi laıyqty baǵalanyp, «Jyl muǵalimi» marapatyna ıe boldy. О́skeleń urpaqqa sapaly bilim men sanaly tárbıe berýdegi jetistikteri úshin aýdandyq bilim bóliminiń «Qurmet» gramotasy tapsyrylsa, keıin «Úzdik bastaýysh synyp muǵalimi» ataǵyna laıyq dep tabyldy. Sóz oraıynda onyń Ulttyq ınternet olımpıadalarynyń jeńimpazdary men júldegerlerin de tárbıelep shyǵarǵanyn atap ótkenim jón dep bilemin. Osynyń barlyǵy Gúlmıra Dúısenqyzynyń mamandyqqa adaldyǵy bolsa kerek.
Bı-Fatıma ERALHANQYZY,
EUÝ stýdenti
ASTANA
Boıdaqtar sany kóbeıip barady
«Aq otaý» klýby boıynsha jarııalanatyn maqalalardy qyzyǵa oqımyz. Jaqynda «Armanym – sulý qyzǵa úılený» degen taqyryppen shyqqan maqalany oqyp, eriksiz qolymyzǵa qalam aldyq. Maqala keıipkeri Esenbektiń momyn, sózge sarań ekeni aıqyn ańǵarylady. Onyń ústine áke-sheshesi aýrýshań bolǵandyqtan, kóp qıynshylyq kórip, der kezinde úılene de almaǵanǵa uqsaıdy. Búginde jasy birazǵa kelse kerek.
Qazirgi kezde jora-joldastary men tamyr-tanystary «súr boıdaq», «kári shal», «qýbas» dep qaǵytady eken. Ázildep aıtylsa da bul sózderdiń shanshýdaı qadalatyny ras. Al Esenbektiń bas quraı almaýy zamandastary retinde bizge qatty batty. Onyń ózine de uıańdyqty qoıyp, batyldaý bol degimiz keledi. Sulý qyzǵa úılengisi kelse, sol jolda kúrese bilýi kerek emes pe? Qyzdar jaǵy da jasy 30-dan asty eken dep aryna tımeı, túsinistik tanytyp jatsa, qandaı ǵanıbet!
Búginde elimizde 25 pen 40 jas aralyǵyndaǵy otaý qurmaǵan qyz-jigitter sany 300 myńǵa taıaý kórinedi. Qanshama otbasy qurylmaı, qanshama bóbek ómirge kelmeı jatyr deseńshi! Buǵan, árıne, áleýmettik jaǵdaıdyń aýyrlyǵy da az kesirin tıgizip otyrmaǵany anyq. Sonymen qatar maskúnemdik pen nashaqorlyqtyń zardaby da aıtarlyqtaı dep bilemiz. Eger áleýmettik ahýal ońalmasa, jastardyń jaǵdaıy ári qaraı da qıyndaı bermek. Bul óz kezeginde elimizdegi súr boıdaqtar men kári qyzdardyń sanyn arttyra túsetini kúmánsiz.
Al biz Esenbektiń ózi sulý bolmasa da jany sulý bir qyzben erterek bas qurap, otbasyly azamat atanýyna tilektespiz. Endi bastalyp jatqan Qoıan jyly keıipkerimizdiń armany oryndalatyn jyl bolsyn!
A.AQQOShQAROV,
M.KAMALIDENOV
TARAZ
