Aqordada Prezıdenttiń atynan aýyzashar berildi

Memleket basshysy bir jyldyń ishinde elimizdiń qoǵamdyq-saıası ómirinde bolǵan aıtýly oqıǵalarǵa arnaıy toqtaldy.

«Jalpyulttyq referendým arqyly Konstıtýsııaǵa ózgerister engizildi. Elimiz úshin asa mańyzdy birneshe saıası naýqan ótkizildi. Sonyń ishinde Prezıdent saılaýy jáne jýyrda bolǵan Parlament pen máslıhattar saılaýy bar. Bir sózben aıtsaq, qysqa merzimde óte aýqymdy jumys atqaryldy. Elimiz jańa dáýirge qadam basty, Ádiletti Qazaqstandy qura bastadyq. Qazaqstan – óz geosaıası aımaǵynda osyndaı aýqymdy reformalar jasap jatqan birden-bir el. Jańartylǵan Konstıtýsııa jáne elimizde bolyp jatqan ózgerister – osynyń aıqyn dáleli. Biz osy reformalardy, jalpy aıtqanda, osy saıasatty mindetti túrde jalǵastyramyz», dedi Qasym-Jomart Toqaev

Memleket basshysynyń aıtýynsha, elimiz halyqaralyq yntymaqtastyqty belsendi túrde jalǵastyra beredi, syrtqy saıasatymyz árdaıym derbes bolady. Biz munyń bárine myzǵymas birliktiń arqasynda qol jetkizip otyrmyz.

«Halqymyz «Yrys aldy – yntymaq» dep beker aıtpaǵan. Qoǵamda beıbitshilik pen kelisim bolsa ǵana, elimiz tabysqa jetedi. Alǵa qoıǵan ıgi maqsattarǵa qol jetkize alamyz. Al elden yntymaq ketse, memlekette damý bolmaıdy, jurttyń bolashaqqa degen senimi de azaıady. Sondyqtan eldiń birligi men yntymaǵyn saqtaý – negizgi mindetimizdiń biri. Bul barshamyz jumylyp atqaratyn jumys bolýy kerek», dedi Prezıdent.

Memleket basshysy halqymyzdyń dúnıetanymyna saı dástúrli ıslamdy dáripteý qajet ekenine nazar aýdardy.

«Qazaqtyń ádet-ǵurpy árdaıym izgilikke shaqyrady. Árbir salttyń tereń tárbıelik máni bar. Mysaly, aqsaqaldarymyz jastarǵa batasyn beredi. Jastarymyz úlkenniń aldyn kesip ótpeıdi, qurmetin kórsetedi, eshkimniń ala jibin attamaıdy. Halqymyz qashanda qyz balany syılap, qadirlegen. Munyń bári dástúrli ıslam qundylyqtarymen tyǵyz úndesedi», dedi Qasym-Jomart Toqaev.

Sonymen qatar Prezıdent óz sózinde ulttyq mádenıetimizdi damytý mańyzdy ekenine toqtaldy.

«Ulttyq mádenıet degenimiz bul – maǵynasy tereń, kópqyrly uǵym. Halqymyzdyń tól mádenıeti salt-dástúrden, ádet-ǵuryptan bastaý alady. Ulttyq kıimniń ózi – ult mádenıetiniń jarqyn kórinisi. Sondyqtan ul-qyzdarymyz ulttyq kıimdi Naýryz meıramynda ıa bolmasa basqa merekelerde jıi kıip júrse, keremet bolar edi. Tek merekede emes, udaıy kıip júrse de, jarasymdy bolatyny sózsiz.  Jalpy, ult mádenıeti – halyq ómiriniń aınasy, onyń bolmysy. Elimizdiń rýhanı damýy ulttyq rýhqa tikeleı baılanysty», dedi Memleket basshysy.

Prezıdent qazirgi jahandyq ahýalǵa alańdaıtynyn bildirip, qoǵamda meıirimdilik, janashyrlyq, qamqorlyq sııaqty qasıetter jetispeı jatqanyna nazar aýdardy. Onyń aıtýynsha, adamzat úshin óte qaýipti bul úrdisti toqtatýǵa bárimiz kúsh salýymyz kerek. Ol úshin osy asyl qasıetterdi árqaısymyz júregimizde saqtap, ony kúndelikti is-áreketpen, kórkem minezben kórsetken abzal.

Memleket basshysy sóziniń sońynda barsha Qazaqstan halqyna amandyq, baq-bereke tiledi.

«Aqorda» rezıdensııasynda Memleket basshysynyń atynan berilgen aýyzasharǵa memleket jáne qoǵam qaıratkerleri, ǵalymdar, dárigerler, muǵalimder, etnomádenı birlestikterdiń ókilderi, dıplomatııalyq ókildikterdiń basshylary, mádenıet qaıratkerleri, qutqarýshylar, eńbek adamdary qatysty.