Energetıka mınıstri Almasadam Sátqalıev qazir respýblıkada 309 myń tonna dızel otynynyń jıyntyq qory bar ekenin málimdedi. Sonymen qatar sáýirde taǵy 441 myń tonna otyn óndirilmek. Osylaısha, sáýirde dızeldiń jalpy kólemi shamamen 750 myń tonna, al boljam boıynsha tutyný kólemi aýyl sharýashylyǵy taýaryn óndirýshiler men QTJ qajettilikterin qosa eseptegende, shamamen 510 myń tonna bolady.
Mınıstrdiń málimetinshe, 7 sáýirdegi jaǵdaı boıynsha, 415 janarmaı quıý stansııasynda dızel otyny bolmaǵan, bul - elimizdegi 3 163 nysannyń 13 paıyzy. Energetıka mınıstrligi tapshylyqty tez arada joıý úshin janarmaı quıý stansııalaryn qosymsha otynmen qamtamasyz etý maqsatynda óńirler ákimdikterinen ótinimder jınady.
Sondaı-aq memleket óńdeý kásiporyndarynda óndiris turaqtylyǵyn qamtamasyz etý úshin barlyq sharany qabyldap jatyr. Atap aıtqanda, Shymkent MО́Z-in jóndeý jumystary merziminen buryn aıaqtalyp, munaı ónimderin jóneltý bastalyp ketti. Bul rette aýyl sharýashylyǵy taýaryn óndirýshiler men otyn tapshylyǵy bar óńirlerdegi janarmaı quıý beketterine basymdyq beriledi.
«QazMunaıGaz» UK AQ basqarma tóraǵasy Maǵzum Myrzaǵalıevtiń aıtýynsha, keıingi kúnderi bolǵan tapshylyq janarmaı quıý stansııalary ıeleriniń baǵa aıyrmashylyǵynyń qysqarýyn kútip, munaı bazalaryndaǵy otyn qoryn jasyryp qalýyna baılanysty bolyp otyr. Osylaısha, jeke munaı bazalarynda elde bar dızel otyny kóleminiń 73 paıyzy jınaqtalǵan.
Qarjy vıse-mınıstri Erjan Birjanov ótken aptada 3 myńnan asa janarmaı quıý stansııasyna taldaý júrgizilgenin, bul rette otyn bola tura, saýda-sattyq kólemi azaıyp ketken nysandarǵa erekshe nazar aýdarylǵanyn aıtty. Iаǵnı satýdy shekteý belgileri bolǵan. Elimiz boıynsha barlyǵy osyndaı 152 janarmaı quıý beketi anyqtaldy. Barlyq derek boıynsha tıisti sharalar qabyldanyp jatyr.
О́ńirlerdegi ahýal men qabyldanyp jatqan sharalar týraly Túrkistan oblysy, Almaty jáne Shymkent ákimderiniń orynbasarlary baıandama jasady.
Roman Sklıar óńirdegi shtabtar belsendi túrde áreket etip, turaqty reıdter ótkizýi keregin atap ótti.
«Alyp-satarlyqqa jáne munaı bazalarynda otyndy «ustap turýǵa» jol bermeý kerek, óıtkeni bul eldiń energetıkalyq qaýipsizdigine tikeleı áser etedi. MKK, QMA jáne BQDA-dan janarmaı quıý stansııasyndaǵy jaǵdaıdy baqylaýdy kúsheıtýdi suraımyn. Janar-jaǵarmaı materıaldary bola turyp, ony satpaı otyrǵan nysandar anyqtalsa, olardy zań boıynsha jaýapqa tartý kerek. «QazMunaıGaz» jáne QTJ zaýyttardan josparlanǵan janar-jaǵarmaı materıaldarynyń kólemin, ásirese dızel otynyn ýaqytyly jáne tolyǵymen jóneltýdi jáne jetkizýdi qamtamasyz etýi qajet», dedi Sklıar.
Sonymen qatar otyrysta kelesi jylý berý maýsymyna daıyndyq máselesi talqylandy.
