Qyzylorda oblysy ákimdiginiń baspasóz qyzmeti habarlaǵandaı, Nurlybek Nálibaev Qazaly aýdanynda buǵan deıin de jappaı tóbeles bolǵanyn, aýdan ákimi men jergilikti polısııanyń osy jaǵdaıǵa jol berip, áreketsizdik tanytqanyn qatań synady. Buǵan qosa, Qyzylordadaǵy №217 mektep oqýshylary sýyq qarý qoldanǵan.
Baıqońyrdaǵy №275 mektepte de tóbeles tirkeldi. Jalaǵash kentinde de eki mektep oqýshysy arasynda janjal shyqqan.
Polısııa departamenti basshysynyń mindetin atqarýshy Shámshıdın Amıtov pen Qyzylordanyń, Qazaly jáne Jalaǵash aýdandarynyń ákimderi, oblystyq bilim basqarmasynyń basshysy Meırambek Shermaǵanbet jaǵdaıǵa baılanysty túsinikteme berdi.
Oblys ákimi tárbıe jumystary tek esep berý úshin ótkiziletinin aıtty. Jaýaptylar oqıǵanyń aldyn alýdyń ornyna únemi saldarymen kúresedi.
О́ńir basshysy tóbelestiń shyǵý sebebin anyqtap, shuǵyl shara qabyldaýdy tapsyrdy. Mundaıǵa jol bergen, ýaqytyly baqylaý jasamaǵan laýazymdy tulǵalardyń barlyǵyna tıisti shara qoldaný kerek. Nurlybek Nálibaev bul jaǵdaıda ata-analar óz jaýapkershiligin seziný kerek ekenin eskertti. Bala tárbıesin mektepke júktep qoıýǵa bolmaıdy.
«Bárimiz de ata-anamyz. Árbir ata-ana azanda mektepke shyǵaryp salǵan balasynyń úıge esen-saý oralatynyna senimdi bolýy kerek. Al polısııa men mektep buǵan qol jetkize almaı otyr. Qyzylorda qalasy men Qazaly, Jalaǵash aýdany boıynsha polısııa basqarmalarynyń jaýapkershiligi qaralsyn. Sonymen qatar, atalǵan mektep dırektorlary men tárbıe isi jónindegi orynbasarlary da osy jaǵdaıǵa jol bergenderi úshin tıisti sharalaryn alsyn», dedi oblys ákimi Nurlybek Nálibaev.
Jıyn sońynda jaýapty basshylarǵa qala men barlyq aýdanda reıd uıymdastyrý, ata-analar men jasóspirimder arasynda túsindirme jumystaryn júrgizý tapsyryldy.
Eske salaıyq, buǵan deıin áleýmettik jelide jasóspirimdi 5 oqýshynyń uryp jatqan vıdeosy tarady. Kúdiktiler anyqtalyp, polsııa bólimine jetkizilgen.
«Atalǵan derek boıynsha qosymsha tekserý jáne áleýmettik jelilerge júrgizilgen monıtorıng nátıjesinde kámeletke tolmaǵan tulǵany uryp-soqqandyǵy anyqtalyp, Qazaly aýdandyq polısııa bóliminiń sotqa deıingi tergep-tekserýdiń biryńǵaı tizilimine QR Qylmystyq kodeksiniń 293-babynyń 2-bóligimen (buzaqylyq) tirkelip, tergep-tekserý áreketteri júrgizilip jatyr», dep habarlady Qyzylorda oblysy polısııa departamentiniń baspasóz qyzmeti.
