Osy ulttyq ustanymymyzdy urpaǵymyzdyń boıyna sińirip, salt-dástúrimizdi jańǵyrtý maqsatynda Jambyl aýdany Beriktas aýylynda turatyn aqsamaıly ájelerdiń uıytqy bolýymen ótetin dástúrli is-shara jyl saıyn jibin úzbeı jalǵasyp keledi. Osy úrdiske oraı, jýyrda 160-qa jýyq aýyldaǵy abysyndar jıylyp, Naýryz merekesin atap ótti. Beriktas aýylyndaǵy Bekbolat babadan taraıtyn jeti tarmaqtyń urpaǵy búginde 200-ge jýyqtapty. Áýlettiń eń úlken anasy Beısenkúl men Bıkamal apalar jas kelinderge ómirdegi kórgen-bilgenderi men oıǵa túıgenderin aıtyp, aqyl-keńesterin berdi.
Zerli kımeshegi jarasqan ájelerimiz «Qamajaı» bıin bılese, izinen ilesken jas kelinder halyq ánderin shyrqap, merekeniń sán-saltanatyn arttyrdy. Qazan men qalamyn teń ustap, qara óleńge júırik ónerli kelinder júrekten shyqqan jyrlaryn oqyp, kóptiń qoshemetine bólendi.
– «Abysyn asy» osy kúni umyt bola bastady. Ýysta ustatpaıtyn ýaqyttyń tapshylyǵynan bir-birin aılap emes, jyldap kórmeıtin jaǵdaıǵa jettik. Qazaqta «Barmasań, kelmeseń jat bolasyń» dep beker aıtpaǵan. Abysyn aralaspaı, tatýlyǵyna syzat tússe, aǵaıynnyń arasy alshaqtaıdy. Birge týǵan balalar bir-birine jatqa aınalady. Sondyqtan osy bereke-birligimizdiń bastaýy bolar dástúrimizdi jas kelinder jalǵastyrady degen úmittemiz, – degen abysyndar basqosýynyń bastamashysy, zeınetker ustaz Altynkúl Qılybaeva aq batasyn berdi.
Almaty oblysy
